Abadayisi bakhale ngemashi
KUVALWE izitolo kwaphazamiseka abadayisi basemgwaqweni ngenxa yemashi kazwelonke yeCosatu ebisedolobheni eThekwini, izolo. I-Cosatu ibimashela ukulahleka kwemisebenzi.
Imashi iqale ngehora leshumi ekuseni epaki esemgwaqweni u-King Dinizulu, yahamba ngomgwaqo uPixley Kaseme ibheke eCity Hall.
Babalelwa ezinkulungwaneni abantu abebesemashini. Amaphoyisa abephume ngobuningi ukuqapha isimo.
Izitolo ezisemgwaqweni uPixley KaSeme ziphoqeleke ukuba zivale ngenxa yabantu abebebaningi futhi bengalawuleki.
Abanamabhizinisi akuwo lo mgwaqo bathe yize bekuqonda ukubaluleka kwemashi kodwa umsebenzi wabo uphazamisekile ngenxa yayo.
UNksz Zanele Mpanza (35) onebhizinisi lokudayisa izinwele, uthe kunzima ukudayisa ngenxa yesiphithiphithi.
“Ngiyazi kuyilungelo labo ukumasha badlulise izikhalo zabo kodwa akusebenzeki njengoba abantu bebaningi kakhulu. Abathengi abakwazi nokubona kahle izinto engizidayisayo ngoba kugcwele kakhulu,” kusho uNksz Mpanza.
Omunye usomabhizinisi, uNksz Vimba Themakazi (33) uthe: “Ayihlelekile le nto abayenzayo ngoba kumele ngabe bahamba emgwaqweni kodwa sebegcwele nalapha esisebenzela khona. Angikwazi nokudayisa ngenxa yalesi siminyaminya sabantu,” kusho uNksz Themakazi.
Uqhube wathi: “Imali esengiyenze namhlanje ayikafiki ngisho kuR50 kodwa ngosuku ngivame ukwenza imali engangoR300 noma ngaphezulu,” kusho uNksz Themakazi.
Abebehambele imashi bebehlukaniswe amaqembu amabili ngenxa yobuningi babo.