UPhuzekhemisi uzobuyela enkantolo
KULINDELEKE ukuthi lishintshe icala elibhekene nomculi kamaskandi uPhuzekhemisi lokuzama ukubulala, kube elokubulala ngemuva kokuthi owesilisa ayemdubulile walimala wagcina eshonile.
UPhuzekhemisi kulindeleke ukuthi avele eNkantolo yeMantshi eThekwini namhlanje njengoba ayephume ngebheyili kaR3 000.
UMnuz Morning Selby Shezi (48), udlule emhlabeni ngoDisemba ngemuva kokuhlala esibhedlela amasonto ambalwa.
Yena noPhuzekhemisi kade besebenza ebhendini kaPhuzekhemisi futhi bengabangani iminyaka eminingi.
UShezi wadubuleka esiswini kwathi uPhuzekhemisi inhlamvu yamhuzula esiphongweni.
Umufi kuvela ukuthi waxabana noPhuzekhemisi bagcina belwa bebanga nesibhamu, kwagcina ngokuthi umufi adubuleke ngezinhlamvu ezine waphuthunyiswa esibhedlela esesimeni esibi.
Ngokwamaphepha asenkantolo, uPhuzekhemisi noShezi bebeseLovu, lo mculi wamshaya ngesidunu sesibhamu wabe esemdubula esifubeni nasesiswini.
Babehamba ndawonye emotweni nomshayeli sebeya esitolo ngemuva kokuzitika ngamanzi amponjwana.
Umnewabo kamufi, uMnuz Sibusiso Shezi, waveza ukuthi umfowabo ushone esethembisa ukwelulama ngoba wayesekhuluma.
Wathi ubesephumile nasegunjini labagula kakhulu esekwelejwayelekile, bese benethemba lokuthi uzophila.
Umndeni wakuveza ukuthi kubuhlungu ukushona kwakhe ngoba bebelinde ukuthi alulame kahle bese eyaphuma abuyele ekhaya.