Kumenele usomahlaya waseThekwini

I-TB yesisu igcine inqobe usomahlaya waseThekwini, u-Ankel, odlule emhlabeni ngoLwesithathu, ngemuva kokugula isikhathi eside.

Lokhu kuvezwe udadewabo ka-Ankel, uBusisiwe Shangase.

U-Ankel ogama lakhe langempela uSibusiso Shangase (30), waKwaMakhutha, ushonele esibhedlela esizimele, eHillcrest.

UBusisiwe uthe, umfowabo ubesegula kakhulu njengoba namaphilisi abengasamsizi.

“Bathola kudala ukuthi uneTB, kodwa odokotela becabanga ukuthi eyofuba. Emasontweni adlule bathola ukuthi yiTB yesisu,” kuchaza uBusisiwe.

Uthe uke wawayeka amaphilisi ngenxa yokungasizakali.

“Ubewuthanda umndeni wakhe futhi ezama ukuthi siphile impilo engcono. Ungene emahlayeni ngenhloso yokusizamela impilo. Ugcine ngokuthi abambe nasekubeni umphathi wezinhlelo emicimbini. Umndeni ufe olwembiza,” kuchaza uBusisiwe.

Ubonge abantu bakueli abalokhu bethumele imiyalezo yenduduzo emndenini.

“Nosaziwayo baseThekwini bathembise ukuseseka, lokho okusho lukhulu kithina,” kuchaza uBusisiwe.