Izitshudeni zifuna ikhomishini iphenye
IZITSHUDENI zinxusa uNgqongqoshe weMfundo ePhakeme kuleli uNkk Naledi Pandor ukuba asungule ikhomishini ezophenya ngodaba lokuphepha ezikhungweni zemfundo ngemuva kokwenyuka kwezigameko zokubulawa nokudlwengulwa kwabafundi.
Abafundi bafuna ukuthi le khomishini iphinde ibheke nodaba lokusebenza konogada ezikhungweni zemfundo ephakeme kulandela isigameko sokubulawa komfundi waseDUT, uMlungisi Madonsela, okusolakala ukuthi wadutshulwa ngonogada.
Amakhulu abafundi basezikhungweni zemfundo ephakeme nasezikoleni zemfundo eyisisekelo, izolo bamashe besuka epaki iKing Dinizulu beya eCity Hall eThekwini lapho befike bethula khona uhlu lwezikhalo zabo ezikhulwini zikahulumeni wesifundazwe kubalwa neNhloko eMnyangweni wezeMfundo esifundazweni, uDkt Enock Nzama.
UNobhala wenhlangano yabafundi edla khezo lunye ne-ANC, iSouth African Student Congress (Sasco) KwaZulu-Natal, uSduduzo Malinga, uthe bayakuqaphela ukwenyuka kwezigameko zobugebengu kubalwa ukudlwengula nokubulala ezikhungweni zemfundo.
“’Sinxusa uNgqongqoshe weMfundo ePhakeme ukuba asungule ikhomishini ezophenya ngezokuphepha ezikhungweni zemfundo, sifuna ukuthi ikhomishini iqede umsebenzi wayo ngaphambi kokuthi kuphele uMeyi nonyaka, sifuna izincomo zayo ukuba zilandelwe ngaphambi kokuthi kuphele uJulayi kulo nyaka,” kusho uMalinga.
Uthe okwamanje ngesikhathi ingakaqali ikhomishini, bafuna ukuthi kufakwe amakhamera kuzona zonke izikhungo zemfundo ephakeme.
“Kuyasikhathaza futhi ukuthi ngesikhathi uhulumeni ezibophezele ekutheni izitshudeni zithole uxhaso lwezimali ngohlelo lweNSFAS kodwa kunezitshudeni okumele ngabe ziyasizwa kodwa ezishiywa ngaphandle,” kusho uMalinga.
Uthe kuyabakhathaza nokuthi izitshudeni azilutholi uxhaso lokuthi bathole izindawo zokuhlala.
“Enye into esiphatha kabi ukwenyuka kwezigameko zokubulawa kwezitshudeni ezikhungweni. siyanxusa ukuthi abafundi balulekwe ngokwengqondo ukuze kugwemeke lezi zigameko,” kusho uMalinga.
UNobhala weCongress of South African Students (Cosas) KwaZuluNatal uKhethelo Goba, uthe uMnyango wezeMfundo kumele wethule izinhlelo zezokuphepha ezikoleni ukuze kunqandeke ubugebengu obenzeka khona.
“Isiphatha kabi lento yokuthi abafundi abaningi baya ezikoleni behlomile ngemimese nezibhamu okubeka engcupheni impilo yabanye abafundi nothisha,” kusho uGoba.