‘Angikaze ngibe yimpimpi’

NGIKAZE ngibe yingede, ngidayise ngamaqabane noma ngisebenze nezitha.”

Lokhu kushiwo ngumengameli Cyril Ramaphosa ephendula izinsolo ezishiwo ngumholi weCope uMnuz Mosiuoa Lekota, othe wabadayisa ngesikhathi somzabalazo.

Ephendula imibuzo ePhalamende izolo, uRamaphosa uthe izinto ezingathi shu, akathandi ukuziphendula kodwa lokhu okushiwo nguLekota ubone kungcono akucacise.

Uthe waboshwa eneminyaka engu-21, ngo-1974 efunda enyuvesi yaseNorth engusihlalo wenhlangano yezitshudeni iSaso.

Uthe amaphoyisa ambopha amvalela izinyanga eziyisithupha engabonwa ngumuntu okubalwa nomndeni wakhe ngoba efuna aphenduke ufakazi wombuso ecaleni elalibhekiswe kuLekota nabanye abaholi ababeboshiwe.

“Nganqaba ukwenza lokhu noma ayesengihlukumeze ngendlela engachazeki kodwa angikaze ngidayise ngamaqabane. Noma sebezama ukuthumela ubaba wami owayeyiphoyisa ukuthi angincenge ukuthi ngibe wufakazi nganqaba ngamtshela ukuthi uma ngenza lokho ngiyophuma ngihlale kuphi,” kubuza uRamaphosa.

Uthe waphinde waboshwa futhi ezinye izinyanga eziyisithupha ngesikhathi kunezibhelu zango-1976.

Uqhube wathi akakaze adayise ngamuntu, wathi ayekwenza kwakuwukulwela abantu bakuleli.

“NoMandela kuke kwaphuma izinto zokuthi wadayisa ngoba wathathwa wayoboshwa yedwa ePollsmoor wasuswa kozakwabo. Ngabuza uMnuz Walter Sisulu ukuthi babhekana kanjani nalezi zinsolo wathi babebheka amava akhe uMandela bangazinaka ezinye izinto,” kusho uRamaphosa.

Uxwayise ngokuthi abantu akumele basho izinto ezivusa uhlevane.

I-ANC ithe uLekota ulahlekelwe amaqhinga ezepolitiki yingakho eseqamba amanga ngoRamaphosa.

UMnuz Zizi Kodwa, ibamba lo mkhulumeli we-ANC, uthe bayamethemba uRamaphosa, wathi lezi zinsolo zenziwa ngumuntu osuke esaba ukuthi kuvezwe izinto ayezenza.

“Ingqungquthela yaseNasrec yakhetha uRamaphosa njengoMengameli njengoba enamava kule nhlangano. Ube yilungu le nhlangano yezitshudeni waba nguNobhala jikelele we National Union of Mineworkers (NUM). Waba nguNobhala wokuqala we-ANC ngemuva kokuvulwa umlomo ngo1990, wahola ithimba eladweba umthethosisekelo wezwe,” kusho uKodwa.

I-EFF inxuse uRamaphosa ukuthi asungule ikhomishini ezophenya ngezinsolo zokuthi wadayisa amaqabane kodwa umengameli ukuchithile lokhu wathi ngeke asungule into ezomosha imali yabakhokhi bentela engeke ithole lutho.

URamaphosa ubuye wachaza nge-Eskom wathi abanazo izinhlelo zokuthi ulawulwe ngabanye abantu wathi uzoqhubeka ube ngaphansi kukahulumeni.

Ukhale kakhulu ngesimo sokucinywa kukagesi wathi bazama ngayo yonke indlela ukuthi balungise simo kule nkampani.

“Ngizoqoka ithimba kwiKhabhinethi elizoholwa yiPhini likamengameli elizobika njalo kumina ngezinto ezithinta i-Eskom. Sizosilungisa isimo kule nkampani sizokwenza yonke into ukuze iphele indaba yokucinywa kukagesi nokubuyisa uzinzo. Asikho isisombululo esisodwa esizoqeda izinkinga ezibhekene ne-Eskom, sidinga ukwenza izinto eziningi. Uma sihlukanisa i-Eskom kathathu, lezi zinhlaka zizoba ngaphansi kukahulumeni zontathu.”

Uthe ungqongqoshe wezimali nguyena ozokwenza isimemezelo ngokuthi kuzongenelelwa kanjani kwa-Eskom.

Ubalule nezinto eziningi ezenziwe nguhulumeni okubalwa ukubahlinzeka ngezimpesheni, amanzi wathi bazokwakha nemisebenzi engu-7 million.