Kuxwayiswa ngobungozi bokulalela umsindo omkhulu ezindlebeni
INHLANGANO yezempilo emhlabeni, iWorld Health Organisation (WHO) ithi balinganiselwa ku-1.1 billion abantu abasha abasengozini yokungezwa ngenxa yokulalela umsindo omkhulu.
Ngokwale nhlangano iningi labantu abasha abaneminyaka ephakathi kwengu-12 kuya kwengu-35 bazibeka engozini ngokulalela umsindo omkhulu njengoba bevame ukudlalela phezulu umculo besebenzisa ama-earphone.
Le nhlangano naleyo ebhekele ezokuxhumana i-International Telecommunication Union (ITU) sezikhiphe imigomo emisha okufanele ilandelwe yizinkampani ezikhiqiza imikhiqizo esetshenziselwa ukulalela umculo okubalwa kuyo amaselula, imisakazo neminye ukuze iphephe uma abantu beyisebenzisa.
UMqondisi Jikelele weWHO, uDr Tedros Adhanom Ghebreyesus, uthe akufanele engabe abantu abasha bazibeka engozini yokugcina bengezwe ngenxa yokulalela umculo kube kunolwazi olungaka ngezobuchwepheshe.
Ngokwezibalo zeWHO, balinganiselwa ku-466 million asebethathwa njengabakhubazekile ngenxa yokungezwa, kulaba kukhona nezingane ezingu-34 million. Bathe iningi lalaba bantu baphila emazweni asathuthuka. UMnuz Qiniso Ndlovu owelapha izinkinga zezindlebe uthe umsindo olalelwa abantu abasha kuma-earphones uyingozi kakhulu ngoba ungaholela ekutheni abantu bagcine bengezwa.
Uthe kwabanye kuqala kancane kancane ngokuthi bakwazi ukuzwa uma bekhuluma nomuntu oyedwa kodwa babe nenkinga uma umuntu ekhuluma nabo kukhona abanye abantu abakhulumayo.
UNdlovu uthe abantu abasha kumele bazivikele ekutheni bagcine bengezwa ukungawudlali kwakhona umculo kuma-earphones. Uthe kungcono uma besebenzisa izipikha lezi ezifakwa i-USB njengoba ethe umsindo awuyi wonke ezindlebeni zabo.
Ezinye zezinto eziphakanyiswe kumigomo ebuyekeziwe yilezi:
Kufanele imikhiqizo inike abantu indlela yokubona ukuthi sebewulalele kangakanani umsindo.
Kufanele imvezele ukuthi ngokwesikhathi abasichithile belalele sebezibeke engozini engakanani ngenxa yendlela abawulalela ngayo. Kumele iphinde ibanike amasu okuzivikela ekutheni bangabi engozini yokugcina bengezwa. Kufanele ikwazi ukuzehlisela umsindo uma kuzwakala engathi sewuphezulu kakhulu. Kufanele abakhiqizi banike abantu amasu okuzivikela ukuze bangazibeki engozini yokulimaza izindlebe zabo.