Kushone umshayeli engozini
KUSHONE umshayeli weloli omunye walimala kabi ngesikhathi kushayisana amaloli abebewashayela kuN3 ohlangothini olubheke eThekiwni, izolo.
Le ngozi eyenzeke phakathi kwaseShongweni neMariannhill Toll Plaza. Abezimo eziphuthumayo bafice abesilisa abathathu, ababili bebelimele kodwa sebephumile elolini oyedwa ebhajwe kwelinye lamaloli.
Iloli ebelingaphambili belilele ngohlangothi ezinsimbini ezibiyele umgwaqo, elinye belishayise kulo nalo selilele ngohlangothi, izimpahla zisakazeke emgwaqweni.
UMnuz Russel Meiring okhulumela abezimo eziphuthumayo kwa-ER24, uthe ngesikhathi befika endaweni yesigameko bafice amadoda amabili elimele kodwa engasekho elolini, eyodwa ibibhajwe kwenye yamaloli.
“Kuze kwadingeka ukuthi sisebenzise izindlawu. Kuthathe isikhathi ngaphambi kokuthi abezimo eziphuthumayo abawongoti baphumelele ukumhlenga, ngemuva kokumhlenga uphuthunyiswe esibhedlela.”
Enye iloli ibithwele izinsimbi enye ibithwele izaqathe. Izinsimbi nezaqathe kusakazeke emgwaqweni okuholele ekutheni kudaleke isiminyaminya.
Kuphele amahora amabili umgwaqo uvaliwe.
UNksz Zinhle Mngomezulu okhulumela amaphoyisa omgwaqo akwaRTI KwaZuluNatal, uthe umshayeli obebambeke elolini ushone ngesikhathi efika esibhedlela.
“Okwamanje asazi ukuthi yini edale ingozi, kuvulwe icala lokubulala ngokungenhloso.
“Uphenyo lwamaphoyisa yilona oluzosicacisela ukuthi yini edale ingozi , amaphoyisa asaphenya,” kusho uNksz Mngomezulu.