UVumase uyisibonelo esihle emnothweni wezwe
NGOLWESITHATHU bekunokhukhulelangoqo wesiteleka sabasebenzi abangamalungu eCosatu bekhala ngezinto ezimbalwa. Obekuseqhulwini lwezikhalo zabo ukuntuleka kwemisebenzi “nokuvikela” imisebenzi yabo.
Amalungu alo mfelandawonye aphume ngobuningi bawo futhi asekwe amadlelandawonye ombimbi, i-ANC neSACP ngoba ukusweleka kwemisebenzi cishe yiyona nselelo enkulu kunazo zonke kulezo iNingizimu Afrika ebhekene nazo.
Ukuvuleka kwamathuba emisebenzi yinto ebonakala izolokhu icothoza kuleli ngenxa yokuxhuga komnotho.
Lokhu kusho ukuthi abantu kumele bazame ngandlela thize ukuthi bazakhele bona amathuba emisebenzi njengoba kwenze uMnuz Thokozani Vumase waseManguzi ebesibhale ngaye oshicilelweni lwayizolo.
Ngo-2011 uVumase, owayengunogada ngaleso sikhathi wanqoba umncintiswano weSolezwe wahlomula ngemoto entsha ceke. Esikhundleni sokujabulela ukuba nemoto entsha, uVumase wabona ithuba lokushintsha impilo yakhe ngoba wayengagculisekile ngoR1 500 ayewuhola.
Wadayisa imoto kwathi ngemali ayithola wazithengela imoto eyisekeni kwasekuthi enye wasungula ngayo inkampani yakhe.
Namhlanje uVumase unenkampani yonogada eqashe abantu abangu-158 abaqashwe ngokugcwele. Unebhizinisi lokuqashisa ngezindawo zokuhlala ngakubo eManguzi futhi usanda kuvula nendawo yobumnandi, iMGZ Lifestyle khona ngakubo.
UVumase uzishintshele yena impilo yakhe futhi akalindanga ukuthi abe nendathane yemali, kunalokho usebenzise leyo encane ayithola futhi okunye okuhle akwenzile ukuthi uthe uma esungula inkampani wagxila kulokhu ayevele esekwazi futhi enesipiliyoni sakho.
Ukubheka uhulumeni ukuthi asungule amathuba emisebenzi futhi enze isimo ezweni sibe ngesiheha abatshalizimali bese kuthi labo abakhona bathuthuke ukuze bezonyusa isibalo sababaqashile kuhle.
Kodwa kuyadingeka ukuthi bande nabantu abazofana noVumase, abantu abazokwazi ukubhukula bazithuthukise bona futhi bagcine kwabona sebengabaqashi.