ISwelihle High igubhe usuku lwesifundo izibalo
BALUGUBHE ngendlela ehlukile usuku lweValentine, abafundi baseSwelihle High, eMlaza abagqugquzelwe ukuthi babe nothando lwezibalo njengoba bebegubha i-Love Maths Day esungulwe uDkt Msizi Mkhize ofundisa i-Accounting enyuvesi yaKwaZulu-Natal (UKZN).
UDkt Mkhize uthe emva kokubona izinga eliphansi lokuphaswa kwesifundo sezibalo kanye nokuzwa izikhalo ngobunzima balesi sifundo ukhethe ukusungula lo mgubho owenzeka njalo ngonyaka.
“Ngigqugquzela abafundi ukuthi baziphile izibalo ukuze zizoba lula kubo. Ngisusa nalo mqondo wokuthi izibalo zinzima ngoba nalokho kunomthelela wokuthi izibalo zibe nezinga eliphansi lokuphaswa,” kusho uDkt Mkhize.
UDkt Mkhize useneminyaka engaphezu kweyisihlanu ehambela izikole ngenhloso yokusiza abafundi ngezibalo. Kulokhu bekukhona abafundi abawu-15 base-UKZN abathole umfundaze kwi-Thuthuka Bursary Fund, nendodana yakhe uSphesihle Mkhize ukuzogqugquzela abafundi ukuthi babe ngabangani nezibalo.
Umphathi womnyango weSayensi kulesi sikole uMnuz Errol Zikalala, uthe bakuthokozele kakhulu ukuba khona kwalo mgubho kulesi sikole.
“Ngiyathemba lizokhuphuka izinga lokuphasa izibalo njengoba sekube khona lo mgubho. Bengikade ngilufisa lolu suku, ngakho ngiyakujabulela ukufika kuka Dkt Mkhize.”
Uthe lesi sikole sihlose ukuthola u-100% esifundweni sezibalo kulo nyaka.