Indoda esolwa ngokudlwengula izovela enkantolo
KULINDELEKE ukuthi ivele enkantolo indoda esolwa ngokudlwengula abantu besifazane ibalutha ngokubathembisa imisebenzi.
Kuthiwa lo mlisa ogama lakhe ligodliwe wadlwengula owesifazane oneminyaka engu-25 emgwaqweni uM19, eThekwini, wase emphuca izimpahla zakhe ngoJanuwari 2019.
Lona wesifazane wasizwa ngamalungu omphakathi amqaqa njengoba aficwa eboshiwe base bebika emaphoyiseni. Kulindeleke umlisa avele eNkantolo yeMantshi eNtuzuma namuhla.
Okhulumela amaphoyisa KwaZuluNatal, uLt Col Thulani Zwane, uthe lo mlisa uboshwe esemsebenzini eNew Germany ngoFebhuwari 14.
Uthe kukholakala ukuthi uyathinteka nakwamanye amacala okudlwengula asenzeke ku-M19 lapho abagilwa bebedlwengulwa bese bephucwa impahla yabo.
“Ubethembisa abagilwa ukuthi uzobatholela imisebenzi bese ethi abahlangane ndawana thizeni bese ebadlwengula. Sinxusa noma ubani oseke wadlwengulwa emuva kokuthenjiswa umsebenzi yilo msolwa ukuthi azobika kumphenyi wecala,” kusho uZwane.