Sitholakele isidumbu sengane eminze iwela umfula
ITHOLAKALE isishonile ingane (11) yaseWaterloo eminze iwela emfuleni ibuya kodlala ibhola eVerulam.
Isidumbu sikaNtandoyenkosi Nzuza sitakulwe emfuleni eVerulam izolo, emuva kwehora lesithathu emuva kokuthi eminze ngoMgqibelo.
Kuthiwa ubehamba nabangani bakhe abayisikhombisa eyodlala ibhola eVerulam. Sebewela umfula kuthiwa ushibilikile waphonseka emfuleni.
Uninakhulu uNkk Nonhlanhla Mdletshe-Nduku uthe umzukulu wakhe ubebuya kodlala ibhola nabangani bakhe njengokujwayelekile kodwa okubamangazile wukuthi bebezihambela bona ngezinyawo besuka eWaterloo beya eVerulam.
Uthe ngokwazi kwabo balandwa ngumqeqeshi wabo uma beyodlala kodwa kulokhu bebezihambela baze bawela nomfula okuyilapho okwenzeke khona lesi sigameko.
Uthe ngesikhathi bebuza umqeqeshi ngokwenzekile ubatshele ukuthi ubebikile ezinganeni ukuthi ngeke kusadlalwa nokuthi ngeke asabalanda kodwa bona baqhubeka baya kodlala.
“Besingazi ukuthi umdlalo awusekho nazo izingane bezingazi yingakho kudida okushiwo ngumqeqeshi wabo. Ngesikhathi emuka, omunye wabangani bakhe uphuthume wamisa abantu abebehamba ngemoto ukuze bamsize,” kusho uNkk Mdletshe-Nduku.
Uthe ngoMgqibelo abatakuli bakhale ngokuthi umfula usenamandla kakhulu ngakho kuzoba nzima ukumbheka base bebuya izolo bamthungatha bangamthola. UNkk MdletsheNduku uthe namalungu omphakathi aphumile ezobasiza ukumthungatha. Kuze kwaba ngabatakuli abafunwe wumndeni abakwaze ukungena bamthungathe baze bamthola.
NgoLwesihlanu u-Amahle Mvuyo (6) wayebhukuda nabangani bakhe emfuleni waseMlaza naye wamuka namanzi.
NgoMgqibelo abatakuli bamaphoyisa nabanye bebelinde ukuthi umfula waseMlaza ubohle ukuze bakwazi ukuqhubeka nokuthungatha u-Amahle.
Uyisemkhulu uMnuz Mvuyiselwa Skhathele uthe u-Amahle ubengayanga esikoleni ngosuku okwenzeke ngalo isigameko.
Uthe bebesekhaya noninakhulu bengazi ukuthi u-Amahle useye kobhukuda nezinye izingane emfuleni.
“Ubezitshela ukuthi uhambe wayodlala nezinye izingane nazo ebezingazange ziye esikoleni. Kuze kwaba abantu abagijime beza ekhaya bazositshela ngokwenzekile,” kusho uSkhathele.
Uthe izingane zasendaweni bezivamile ukuya kobhukuda uma kushisa.
Okhulumela amaphoyisa, uLt Col Thulani Zwane, ukuqinisekisile ukuthi amaphoyisa abethungatha lezi zingane emuva kokuthi zimuke ezigamekweni ezahlukene.
Uthe kuvulwe idokodo emuva kokuthi isidumbu sikaNtandoyenkosi sitholakele emfuleni izolo.