Izethembiso zamaqembu ngokhetho
EZEMFUNDO, umhlaba, ukulwa nenkohlakalo, ukuthuthukisa ezempilo, amathuba emisebenzi ngezinye zezinto abaholi bamaqembu i-UDM, ACDP nePeople’s Revolutionary Movement (PRM) abathe bazozenza uma bewina ukhetho ngoMeyi 8.
La maqembu athule umqulu wokukhankasela ukhetho ngempelasonto ezifundazweni ezahlukene.
Umholi we-UDM uGeneral Bantu Holomisa uthe ziningi izinto abazozenza uma bewina ukhetho njengoba bezosiza omasipala kwakhiwe amakhono ukuze kuvalwe igebe lokushoda kwamakhono.
Uthe lokhu kuzodala amathuba emisebenzi wathi kwezemfundo bazotshala imali ukuze zonke izikole zibe nezinsiza kufundisa.
“Sifuna izikole zibe nengqalasizinda, kube nemitapo yolwazi, ama-laboratory, amakhompyutha labs nezinye izinsiza ezibalulekile. Sizovula amakolishi siqhubeke nemfundo yamahhala.”
Ukhale ngenkohlakalo ngaphansi kukahulumeni we-ANC wathi abantu akusamele bayethembe.
I-UDM ithule umqulu wokhetho eNelson Mandela Bay, e-Eastern Cape.
Umholi we-ACDP uMfundisi Kenneth Meshoe, uthe kumele osopolitiki abalahlwa amacala enkohlakalo bangavunyelwa ukuthi bayomela amaqembu ePhalamende.
UMeshoe othule umqulu wokhetho eKapa ngempelasonto, uthe kumele kuhlolwe indlela okuphila ngayo izisebenzi zikahulumeni.
“Ukungasebenzi kwabantu kuleli kuvimba inqubekela phambili yezwe. Kumele baboshwe labo abathinteka ekuweni kwebhange iVBS Mutual.”
Uthe bazolwa nendaba yokudliwa komhlaba ngenkani wathi bazokwakha amakhono adingekayo kwezomnotho.
“Sizovikela ilungelo lenkolo ezikoleni zethu, sakhe imfundo ezohambisana nokudingwa ngumnotho. Sizobuyisa abahloli abavalwa kwezemfundo, siqinisekise ukuthi amaholo othisha ayakhushulwa nokuthi uthisha angafundisi abafundi abevile ku-25 ekilasini.”
UMengameli wePRM, uMnuz Nhlanhla Buthelezi, uthe balwa nokuthi kuhushulwe izisu, kudayiswe ngomzimba wathi uhulumeni angakwazi ukwakha amathuba emisebenzi.
“Asihambisani nabantu abathandana nobulili obufanayo, hhayi ngoba sibazonda. Asihambisani nokuhushula ngoba ukubulala lokho.”
UButhelezi uthe bazongenela ukhetho kuzwelonke wathi banesihlalo kumasipala waseNewcastle kuwadi 33.