I-DUT ihlushwa yimilayezo edukisayo

ISIKHUNGO seMfundo ePhakeme, iDurban University of Technology, sinxuse abaholi bezitshudeni ukuba bayeke ukusabalalisa imininingwane edukisayo enkundleni yokuxhumana iFacebook mayelana nokuqala kokufunda kule nyuvesi.

I-DUT imemezele ukuthi yamukele isiphakamiso somkhandlu wezitshudeni sokuthi kuzoqala ukufunda namhlanje enyuvesi emva kokuvalwa kwayo kulandela ukudutshulwa kubulawe uMlungisi Madonsela obeyisitshudeni eDUT.

Izitshudeni zisamukele ngezindlela ezingafani lesi simemezelo njengoba ezinye zisihlabile ngoba abaphathi besikhungo bebengakahlangabezani nezidingo zazo. Ekhasini le-Facebook womkhandlu wezitshudeni bekunemilayezo eyalela izitshudeni ukuthi zingalubhadi kulesi sikhungo ngoba ukubhikisha kuyaqhubeka. Eminye imilayezo beyithi kuzoba nemashi ebheke eCity Hall yokuzwakalisa izikhalo zazo. Izitshudeni zikhala ngokuthi kukhona abangakabhalisi ngoba kuthiwa bakweleta inyuvesi.

Esitatimendeni esikhishwe yinyuvesi abaphathi bathe imiyalezo idukisa izitshudeni.

“Siyabona ukuthi imiyalezo edluliswa kwiFacebook ithunyelelwa ukuthusa nokudukisa izitshudeni, abasebenzi baseDUT nabazali ngokuzokwenzeka kule nyuvesi.

I-DUT idalule ukuthi iyavumelana nomkhandlu wabafundi ukuthi kuqale ukufunda namhlanje ngemuva komhlangano owawungoFebhuwari 8 lapho umkhandlu waphakamisa khona ukuthi kuqale ukufunda ngemuva komngcwabo kaMlungisi.

Inyuvesi ithe isibhalise izitshudeni ezingu-28 607 nezilindele ukuqala ukufunda. Kuphinde kwabhalisa izitshudeni ezingu 2 914 emva kokuthi umkhandlu wezitshudeni ukhiphe uhlu lwezikhalo zawo ngomhla ka-4 Febhuwari.

Abaphathi bathe bazimisele ngokusebenzisana nomkhandlu wabafundi ukulungisa izinkinga ezibhekene nezitshudeni.