Zizonikwa imiphumela izitshudeni ezikweleta izikhungo
ZIZOTHOLA izitatimende zemiphumela yokuhlolwa izitshudeni ezikweleta amanyuvesi kodwa izitifiketi zizobanjwa.
Lokhu kushiwo nguNgqongqoshe weMfundo ePhakeme uNkk Naledi Pandor, othe kuyilungelo lazo zonke izitshudeni ukuthi zithole izitatimende zazo.
UNkk Pandor uthe uxoxile nomkhandlu olawula amanyuvesi ngalolu daba.
“Izikhungo zizibophezele ekutheni zizozinika izitshudeni izitatimende zokuthi zenze kanjani noma kuthiwa ziyakweleta. Izitshudeni zinelungelo lokuthi zazi ukuthi zenze kanjani ukuze zikwazi ukuthola imisebenzi,” kusho uNkk Pandor.
Ezikhungweni eziningi izitshudeni zihlale ziteleka zikhala ngokuthi azikwazi ukuthola imisebenzi ngoba zisuke zibanjelwe imiphumela yazo.
Zihlale zinxusa ukuthi okungenani uma zinikwa izitatimende kubanjwe iziqu lokhu kungasiza ngoba zizokwazi ukuthola imisebenzi.
UNkk Pandor uthe akekho okumele angabhalisi uma exhaswe yisikhwama iNational Students’ Financial Aid Scheme ngoba kuthiwa uyakweleta.
“Ngikhathazekile ngabenza unyaka wokugcina okungenzeka ukuthi abavunyelwe ukubhalisa ngoba benesikweletu esidala. Ngiyalele umnyango ukuthi usebenzisane nezikhungo ukuze kuqinisekiswe ukuthi izitshudeni zibhalise ukuze ziphothule izifundo zazo.”
Uthe abakwazi okwamanje ukuthi bangaxazulula indaba yezikweletu zezitshudeni ngoba basagxile kwabahlwempu.
“Sakha umgomo wokuthi kube nesikalo esizobizwa yizikhungo zemfundo kusuka ngo-2020. Sifuna ukuqinisekisa ukuthi akubizi kakhulu ukufunda. Kulo nyaka sibeke uR30.8 billion ukusiza abaxhaswe yiNSFAS emanyuvesi nasemakolishi,” kusho uNkk Pandor.
Uthe zonke izitshudeni ezixhaswe yiNSFAS zizothola uR5 000 okuyimali yokuthenga izinsiza kufunda.
“KunoR154 million okusamele ukhishwe yiSBux uye kwizitshudeni. INSFAS ithungatha abangakayitholi le mali kanti siyacela labo abaziyo ukuthi kumele bathole le mali bashayele iNSFAS.”
Uthe kubekwe uR10 million wokwenza ucwaningo besebenzisana nezitshudeni kanjalo nabaphathi bamanyuvesi ukubheka indaba yengqalasizinda yezokuphepha ezikhungweni kanjalo nezikhungo zezempilo ezikhungweni.
Mayelana nezindawo zokuhlala ezihlale zitelekelwa yizitshudeni, uthe babeke uR4.1 billion kuze kube ngunyaka wezimali u-2020/21 wokwakha lezi zindawo.
“Sakha ingqalasizinda ezohlomulisa izitshudeni ezingu-200 000 eminyakeni engu10 ezayo. Eminyakeni emithathu ezayo sizohlinzeka ngemibhede engu-18 222.”