Uhulumeni kufanele anabe ngale migomo emisha yokuqasha
UHULUMENI uthi usuzoqale ubheke ukuthi abantu abafake izicelo zokuqashwa baziphatha kanjani ezinkundleni zokuxhumana nokuthi bami kanjani ezikweletini.
Lesi simemezelo senziwe nguMnyango weziSebenzi nokuPhatha. Okunye okuzobhekwa ngukuthi osuke efake isicelo somsebenzi akakaze yini alahlwe amacala, ubuzwe bakhe, iziqu kanjalo nalapho eke wasebenza khona.
Okunye vele kuyabhekwa ngaphambi kokuthi umuntu aqashwe kodwa okwezinkundla zokuxhumana kuzobe kuqala.
Lo mnyango uthi akekho umuntu ozocwaseka kodwa kuyacaca ukuthi lena ngenye yezindlela yokulawula indlela abasebenzi bahulumeni abaziphatha ngayo ezinkundleni zokuxhumana.
Nakuba ingehli kahle le ndaba kodwa kukhona ukuthi okusuke kusezinkundleni zokuxhumana kuvele sekusesidlangalaleni nokusho ukuthi akusikho ukuthi uhulumeni uzobe epequlula izimfihlo.
Izinkampani ezizimele sezivele ziyayibheka indlela umuntu aziphatha ngayo ezinkundleni zokuxhumana kanti ngisho abafundi abafake izicelo zomfundaze ezinkampanini ezizimele kuyabhekwa abakwenza nabakubhala ezinkundleni zokuxhumana.
Kuyiqiniso ukuthi kukhona izinto ezingamukelekile ezishiwo ngabantu ezinkundleni zokuxhumana njengokucwasa ngokobuhlanga, ubulili, ubuzwe, ukugqugquzela udlame, ubugebengu nokudicilela phansi isithunzi somunye umuntu.
Kuyazwakala futhi ukuthi uma ungumuntu owenza lezi zinto kungani umqashi engaba manqika ukukuqasha.
Kodwa uhulumeni kumele akhulume iqiniso ukuthi uqondeni ngempela ngoba akukholakali ukuthi bathi abazukucwasa abafake izicelo.
Uhulumeni awuphumele obala futhi ukuthi uqondeni ngempela ngokuthi uzobheka nezikweletu zabantu. Ngabe abantu abacwile ezikweletini ngeke baqashwe? Bahlanganiseni nezikweletu zabantu uma kungabantu abazobe bengasebenzi ngemali kahulumeni?
Ngisho umuntu enza into enhle, akulula ukuyeseka uma engagonyuluki asho ukuthi inhloso iyini ngempela. Kusafanele uhulumeni anabe ngale migomo emisha.