Babuye babhede abanye bangaphandle
ELAMONTVILLE Ntabeni Mfana weNtaba EHAMMARSDALE MHLELI: Kwelakho eliwuwela udla izindwani ngithi ake ngisike elijikayo.
Anginayo inkinga ngabantu bokufika ngoba nabo bangabantu bayaludinga uthando nokuhlonishwa njengabo bonke abantu abayizidalwa zikaNkulunkulu.
Ngize nginenqwaba yabangani abasuka le eMozambique.
Yize noma ngingenankinga ngabo kodwa kunemikhuba eminingi engikhathazayo ngabanye abaphuma emazweni angaphandle.
Angizukugxila kulena eminingi osekubikwe kakhulu ngayo kodwa ngizothinta okukodwa nje abakwenzayo okungangiphathi neze kahle.
Sekukaningi kukhalwa ngezimpahla eziphelelwe yisikhathi abasidayisela zona. Kuthiwa uhulumeni uyayenza imizamo yokukunqanda lokhu kodwa kunhlanga zimuka nomoya ngoba bayaqhubeka.
Kunesitolo nje esithenga kusona la eCato Manor. Bakuthengisela into esidlulelwe yisikhathi okuthi uma usuyibonile wayiphindisela kubona ubatshele ukuthi inenkinga bavele bakutshele ukuthi: “Ncese besingabonanga.”
Uma usuphindela esitolo emva kwezinsuku ezine uzofica kusadayiswa yona futhi le mpahla edlulelwe yisikhathi. Abanandaba nempilo yomuntu.
Okungikhathaza kakhulu wukuthi namakhondomu amaTrust kungenzeka ukuthi sebedayisa angumkokotelo wabo ngoba uma uwavula phakathi awafani namanye amaTrust asuke ethengwe kwezinye ezitolo.
Ngike ngaya komunye osebenza emnyangweni wezempilo ngiyombuza ukuthi kufanele yini abe kulesi simo engangimchazela ngaso,wathi akanalo ulwazi olwanele ngezinhlobo zamajazi okuzivikela.
Nginengebhe yokuthi sizongenwa yizifo ekubeni sizitshela ukuthi sikugqokile okokuzivikela. Okhathazekile EMAYVILLE