Bakhala ngabantshontsha udizili kuMasipala waseMzinyathi
KUKHALWA ngabasebenzi bakaMasipala waseMzinyathi abaqola umasipala udizili bayowudayisa ngaphandle nosekudale ukuthi kube nenkinga yamanzi emiphakathini eminingi.
Lokhu kuvezwe yimeya kamasipala wesifunda uMzinyathi, uMfundisi Petros Ngubane nemenenja kamasipala, uMnuz Sipho Ndabandaba ngesikhathi kunengqungquthela yokuhlela ukusebenza konyaka ebiseDundee.
“Sibhekene nesimo esingesihle sokuntuleka kwamanzi esidalwe abasebenzi esesibabambile ukuthi badayisa udizili wamaloli amanzi nowemishini ephehla amanzi. Lo mkhuba bawenza kakhulu eMsinga nakoMvoti lapho iloli likadizili livamise ukutholakala khona kudayiselwa abantu. Lokhu sekudale ukuthi kube nenkinga yamanzi koNquthu, Msinga, Mvoti naseDundee ngoba imishini ephehla amanzi ayikwazi ukusebenza udizili ungekho,” kusho uNgubane.
UNdabandaba uthe bahlela ukubathathela izinyathelo abasebenzi abathintekayo ngoba abakwazi ukubekezelela inkohlakalo.
“Ngisho nabangamalungu omphakathi abathenga udizili sizobathathela izinyathelo ngoba abakwenzayo kufana nokweba. Sizobavulela necala emaphoyiseni ukuze nomthetho usebenze,” kusho uNdabandaba.
Ngaphandle kwalokho umasipala usuthathe isinqumo sokuvala izinkampani eziwusiza ngemisebenzi ethile ngoba kukhalwa ngokuthi zidla imali eningi. IMeya uNgubane ithe sebevale nezimoto eziqashisayo banquma ukuzithengela ezabo.
Uthe bebesebenzisa imali ebalelwa kuR10 million ngonyaka abebeyikhokhela izinkampani ebezibasiza ngokuqasha izimoto ebezibalungisela ingqalasizinda kagesi neyamanzi.