Unqobile uthisha ofundisa iSayensi
UTHISHA odle umhlanganiso eqwaqwada abanye emncintiswaneni wothisha abavelele eNingizimu Afrika ekufundiseni iSayensi, uthe kwaba yiqhinga likaNkulunkulu ukuthi ayeke umsebenzi awufundela angene ekufundiseni.
UMnuz Mfanafuthi Nkosi (30) waseMadadeni, eNewcastle, ofundisa ePanorama Combined eNewcastle, udle umhlanganiso ekufundiseni iSayensi wawina imoto, izindondo, ivawusha, i-laptop, printer kanjalo nomakhalekhukhwini.
Uwine emncintiswaneni wokuklomelisa othisha abavelele obungempelasonto eGoli.
UNkosi oneziqu zeGeology azithola eNyuvesi yaKwaZulu-Natal ngo-2012 uqale ukufundisa ngo-2013.
“Kwaba yiqhinga likaNkulunkulu ukuthi ngifundise ngoba ngiyathanda ukusiza umphakathi nezingane. Ngiqale ngiyobambela uthisha owayeyobeletha ngifundisa iMaths. Kuthe kuhamba uthisha owayefundisa iSayensi ngangena kuyona ngayifundisa,” kusho uNkosi.
Uthe waba esenza iPGCE ukuze abe neziqu zokufundisa wathi ngo2017 uqashwe ngokugcwele kulesi sikole.
Nyakenye uthe ufundise iSayensi kwa-matric, wayisusa ku-48% wayiyisa ku-93%.
“Kubafundi abangu-30 kufeyile ababili kuphela, kunabanye abathole o-A kulesi sifundo. Nyakenye ngikhohlwe wumsebenzi engawufundela ngoba ngithanda ukusiza abantu. Ngiyazi ayikho imali ekufundiseni, ikhona kulokhu engakufundela kodwa nginothando lokuthuthukisa ingane emnyama.”
Uthe eqeda ukuthola iziqu zeGeology uke wazama ukuyofuna umsebenzi waya naseWitbank kodwa kwangalunga.
Kwezemfundo wangena ngokuhambisa izinto zakhe ezama inhlanhla emahhovisi omnyango eMajuba ukuze angene kwi-database.
“Nganginemiphumela emihle, ngisho esikoleni ngangiyiphasa iSayensi ngicabanga ukuthi ingakho bangibiza ukuthi ngizobamba ngoba imiphumela yami yayimihle.”
Uthe noma bengenazo zonke izinsiza zeSayensi kodwa unezindlela afundisa ngazo acabanga ukuthi yizona ezimsizayo.
“Noma amafoni engavunyelwe esikoleni kodwa ekilasini lami abafundi ngiyabagqugquzela ukuthi baqophe konke okusuke kufundwa ukuze bakwazi ukukusebenzisa uma sebesekhaya noma sebebuyekeza. Sine-WhatsApp group, esiyisebenzisayo ngisho ngingekho abafundi bayakwazi ukubuza ngibaphendule akudingeki ukuthi ngize ngibe sesikoleni,” kusho uNkosi.
Uthe uma sekushube ngempela sekuzobhalwa kuba namakhempu lapho kulalwa khona kwakhe ukuze kubuyekezwe.
“Ngishintshe igaraji ngalenza isikhungo sokufundisa iSayensi. Angikasibhalisi lesi sikhungo kodwa ngisiza nabafundi bakwezinye izikole ngalesi sifundo. Sisebenzisana namaphoyisa asizayo ngokuzulazula uma sekufundwa ekhaya ukuze abafundi baphephe ngoba kukhona nabafundi abasuka kude kakhulu. Unkosikazi wami ungeseka kakhulu kulokhu ngoba engikwenzayo kusiza ingane emnyama,” kusho uNkosi.
Uthe ugqugquzelwe nguthishanhloko wakhe ukuthi angenele lo mncintiswano.
“Uthishanhloko walala isibili kulo mncintiswano ngo-2015 ezintweni ezithinta ubuholi. Ungigqugquzele kakhulu ukuthi ngiwungenele ethi ucabanga ukuthi ngingawudla umhlanganiso, nakhu ngempela ngiwinile.”