Bakhungathekile imeya ishona ngokuzuma
USHAQEKILE umndeni noMkhandlu waseMshwathi ngokudlula emhlabeni ngokuzuma kwemeya uNkk Siphindile “Maphindi” Zondi-Mbhele.
UNkk Zondi-Mbhele (44), waseMtulwa, obeyiMeya yaseMshwathi ushone ngeSonto ebusuku kulandela ukugula isikhashana. Ngokusho kokhulumela umndeni, uMnuz Mandla Zondi, iMeya yaya kudokotela ngoLwesihlanu iyobheka isimo sempilo yayo yabe isilaliswa emuva kokuthi udokotela engaboni kahle okuthile ngempilo kamufi.
“Udokotela wamlalisa ewumuntu ozohlolwa. Abamvakashela ngoMgqibelo bafike engenankinga, ezikhulumela.
NgeSonto ebusuku sithole umyalezo esibhedlela othi umndeni uphuthume njengoba ubengasaphefumuli kahle sengathi uvukwa i-astma obekuyisifo angenaso. Kumenele ngalo iSonto.
Kusishaqisile lokhu njengoba ebengaxiniwe ukugula, yize ebengumuntu vele ohlala ngokugula kodwa ubengaxinekile. Silahlekelwe njengoba ubewusizo olukhulu ekhaya, ubengeyona iMeya nje kuphela, ubeyilungu lomndeni eliwukhathelele kakhulu,” kusho uZondi.
Iphini leMeya uMnuz Promise “Pro” Dlamini, lithe bewumkhandlu bafe olwembiza ngokuhamba kwalo mholi obenamava. “Ubona nje asazi ukuthi sizamukele kanjani lezi zindaba ngoba besingalindele ukuthi adlule emhlabeni, ubengaguli.
NgoLwesine nje sasisonke emsebenzini, usuku lwaze lwaphela. Kuthe ngoLwesihlanu wathi uya kudokotela, wabe eselaliswa. NangoMgqibelo besithumelana imiyalezo emafonini, engumuntu ozophuma noma inini esibhedlela. Ngithukile ngitshelwa umndeni ukuthi akasekho.
Silahlekelwe umuntu obewuthanda umphakathi futhi ewusizo olukhulu,” kusho uDlamini.
UNkk Zondi-Mbhele ngaphambi kokuba aqokwe ukuba imeya emuva kokhetho luka-2016, ubeyiphini lemeya eMshwathi, amahlandla amabili.
Uyaziwa ngabaningi njengomholi we-ANC. UNkk Zondi-Mbhele, umndeni wakhe uthe ubengenabo abantwana.