Kuyancomeka okwenzelwe abakhubazekile
IZINGANE eziphila nokukhubazeka eMsinga sezinesikole esinakekela izidingo zazo ngokupheleleyo. Ngesonto eledlule kwethulwe ngokusemthethweni i-Ukukhanya koMsinga, esigodini saseSidakeni.
Lesi sikole yisona kuphela esifundisa lezi zingane eMsinga. Isibalo sabafundi singu179, sinamagumbi okufunda angu-20, igumbi lamakhompyutha, indawo yokuhlala abafundi abangu-250 bese kuba ngothisha abangu-17 nabasizi bothisha abangu-11, ababili abahlanza isikole, umabhalane, onogada ababili, ophekela izingane kanjalo namabhasi amathathu athutha abafundi ezigodini ezahlukene.
Namhlanje lesi sikole sesihlangene saze sahlinzekwa ngazo zonke lezi zinsiza, okunye okusizile ukuphokophela kukathishanhloko waso, uNkk Nonhlanhla Dlamini.
UNkk Dlamini waqala ukufaka isicelo sokuthi kwakhiwe lesi sikole ngo-2006 okuwunyaka ababhaliswa ngawo njengesikole, baqala ngabafundi abangu-10. Baqala befundisa emakilisani odaka, kwashintshwa kwafika angomahambanendlwana kwaze kwagcina kuqaliwe ukwakhiwa ngo-2010.
Izingane eziphila nokukhubazeka azinakekeleki kahle futhi izikole ezihlinzeka lezi zingane ngazo zonke izidingo ziyashoda. Kokunye sike sibike ngosizi abanye abazali abanalaba bantwana behluleka ukubatholela izikhala ezikoleni.
Lezi zikole zishoda ngisho emadolobheni amakhulu, ingasaphathwa-ke eyasezindaweni zasemakhaya ezifana naseMsinga.
Kuyancomeka kakhulu lokhu okwenziwe nguNkk Dlamini ebambisene nalo lonke ithimba abelokhu ewa evuka nalo. Siyamcoma noNdabezitha, inkosi yabaThembu okuwuyena obasikele indawo isikole esakhiwe kuyo.
Ziningi izidingo ezikhona emiphakathini futhi akulula ukuthi zonke zifezwe kanyekanye nanokuthi ziqhakanjiswe zonke ngendlela efanayo.
Kodwa ukuba khona kwabantu abazofana noNkk Dlamini, baphokophele, bangapheli mandla ukusukumela ukuthi kunakwe isidingo esithile kuze kutholwe isisombululo yikhona okuzoyisa isizwe phambili.
Sengathi umphakathi waseSidakeni ungahlala ubambisene futhi usinakekele isikole nezinsiza zaso ukuze abantwana bezohlale besizakala.