Abasebenzi beBosasa engcupheni
BANGASE balahlekelwa umsebenzi abantu ababalelwa ku-4 500 abasebenza enkampanini i-African Global Operations, eyayibizwa ngeBosasa Operations phambilini. NgoMsombuluko abale nkampani baveze ukuthi izovalwa ngenxa yokuvalwa kwama-akhawnti ayo emabhange amakhulu kuleli.
“Kuyadabukisa kakhulu ukuthi ibhodi labaqondisi be-African Global Operations selikhethe ukuthi ivalwe inkampani,” kusho abale nkampani esitatimendeni esisayinwe umqondisi, uMnuz Johannes Gumede.
“Sithole incwadi evela emabhange esisebenzisana nawo, ethi ayaziqhelisa enkampanini, okuchaza ukuthi azovalwa amaakhawunti enkampani ngaphambi kukaFebruwari 28 nonyaka.”
IBosasa ibe sematheni nonyaka emuva kokufakaza kowayeyisikhulu kuyo, uMnuz Angelo Agrizzi nabanye ababesebenza kuyo, kwiKhomishini kaZondo ephenya ngokulawulwa kombuso yidlanzana.
U-Agrizzi nozakwabo baphumela obala ngomkhonyovu obuwenziwa kule nkampani nokushushumbiswa kwezimali ezinye zazo ebezisetshenziselwa ukugwazela izikhulu ezikuhulumeni.
U-Agrizzi wachaza kabanzi ukuthi umsunguli oyisikhulu esiphezulu, uMnuz Gavin Watson wayebagwazela kanjani abaholi abakuhulumeni ukuze iBosasa ithole amathenda ezigidigidi zamaRandi.
IBosasa ithe okuvele kwiKhomishini kaZondo kwenze amabhange amaningi aziqhelise kuyo, kumanje isiyahluleka ukuthola i-akhawunti yebhizinisi ebizwa nge-trading account.
Inkampani iveze ukuthi ayivalwa ngenxa yezinkinga zemali noma umsebenzi kodwa amabhange angafuni ukuyivulela i-akhawunti yokusebenza.