I-Kings ihlola umgadli waseZim
UKUZAMA ukuxazulula inkinga yayo yamagoli i-Real Kings, ebhedelwa wuhlelo kwiNational First Division (NFD), kuthiwa ihlola umgadli waseZimbabwe.
IKings, eqeqeshwa uSimo Dladla, ihlola u-Emmanuel Kudashwe Mandiranga (osesithombeni), okuthiwa sekuphele amasonto amabili eziqeqesha nayo.
UMandiranga, obuye adlale ohlangothini lwesokudla, ubedlalela iDynamos FC edlala kwiZimbabwe Premier Soccer League (ZPSL). Ngaphezu kwalokho uke wadlalela iqembu lesizwe lika-Under 23 nakwiHow Mine FC yakwaBulawayo nayo edlala kwi-ZPSL. Ethintwa ngalo mdlali uDladla uthe: “Yena ukhona uyazilolonga neqembu. Ngicabanga ukuthi lizophela leli sonto sengazi ukuthi uyasayina noma cha,” kusho uDladla. Sithole ukuthi kuleli sonto kulindeleke ukuthi liphele iKings, edonsa kanzima kwi-log ngale sizini, seyisayinise uZimele Zuma obe wusizo olukhulu ekubekeni iSummerfield Dynamos endaweni yokuqala kwi-log ye-ABC Motsepe League KwaZulu-Natal.
Izinto ziyayibhedela iKings eshaywe yiTS Galaxy ngo1-0 emdlalweni wayo odlule. Bekungumdlalo wesithathu kulandelana lishaywa.
Ukunqoba lagcina ngonyaka odlule lishaya yona iGalaxy ngo-2-0. Kwi-log lihleli endaweni yokugcina ngamaphuzu awu-18 ngemuva kwemidlalo ewu-20.
Ngesonto eledlule ngesikhathi iKings ishaywa Uthongathi FC kubonakale uThami Ngubane oke waqeqesha iThanda Royal Zulu kumasizini edlule. Kunabathi iKings ingase imqashe uNgubane.
Nokho okhulumela iKings, uPhilani Majola, ukuphikile ukuthi angase axoshwe Dladla. Uthe kabakaze baxoxe noNgubane. Esikhundleni sokuthi bamxoshe uDladla kodwa bazozama ukumelekelela ngayo yonke indlela.
Umdlalo olandelayo weligi, iKings izowudlala neMaccabi FC ngoFebhuwari 23 eSugar Ray Xulu Stadium, eClermont. Ngeledlule iMaccabi, esendaweni ka-12 kwi-log, ishaywe iTS Sporting ngo-1-0.