UMazinyo ujabule ngabakuzuzile
USEBHEKE abazoqhathwa nabo kuma-quarterfinal eNedbank Cup u-Ernst Middendorp opheka iKaizer Chiefs, engene kulesi sigaba seliyoshona ishaya iThe Magic FC ngo 3-0, okungamagoli angene esikhathini esengeziwe.
Emidlalweni emibili ilandelana Amakhosi athwaliswe kanzima amaqembu asesigabeni samaamesha, i-ABC Motsepe League.
Emdlalweni weLast 32 kwadingeka ukuthi idlule ngegoli elaba wumkhonto ogwaze ngasekhaya ibhekene neTornando FC.
Ngempelasonto eNelson Mandela Bay, abalandeli bese bemince okokugcina iqembu labo lenza konke ukushaya igoli kodwa lutho ukudlula odongeni lweThe Magic.
Luze lwagqobhoka ngomzuzu ka-105, uDaniel Cardoso eshaya iphenathi ngemuva kokudlaliswa kabi kukaKhama Billiat.
UPhilani Zulu noBilliat babe sebelandela ngamanye amagoli amabili.
Kuma-quarterfinal iChiefs efuna indebe yayo yokuqala eminyakeni emithathu, ijoyine iChippa United, Cape Town City, Bloemfontein Celtic, Cape Umoya neTS Galaxy.
Iqembu lesishiyagalombili liphume izolo ebusuku emdlalweni obuqhathe iBidvest Wits neBlack Leopards. La maqembu azoqhathwa ngoLwesine ntambama.
Ekhuluma nabezindaba ngemuva komdlalo uMiddendorp uthe “akacasukile” ngokubhuquziswa amavukane yena nje ujabulela ukuthi bakutholile ababekuhlosile.
“Njengoba ngike ngasho phambilini, inhloso yethu bekuwukungena emaqembini ayisishiyagalombili okugcina. Sikwenzile lokho,” kusho uMiddendorp.
“Ngishilo nokuthi isitha sethu esikhulu kuzoba yithi uqobo. Sikwenzile konke ukulungiselela nokuhlela ukuthi singena kanjani ezikhaleni ukwakha amathuba (amagoli).
Sikwenzile lokho imizuzu ewu-90. Sizenzele phansi ngendlela esiqedele ngayo lawo mathuba. Besingenza kangcono. Ekugcineni sidinge imizuzu ewu-120 ukuthola umphumela ebesiwufuna. Sesilinde uLwesine,” kusho uMiddendorp.
Lo mqeqeshi ukugcizelele ukuthi akabasoli abadlali bakhe ngokuyeka amathuba emdlalweni.
“Uma ungumqeqeshi igama lokucasuka akumele libe wumngani wakho. Kumele ukuqonde ukuthi uma usebenza neqembu awuliphosi ithawula.
Kumele usebenze kuze kulunge lokhu okufunayo. Siyazi ukuthi abadlali abathile bebengenza kangcono ekuqedeleni amathuba kodwa lokho akungidini. Leli akulona igama umqeqeshi okumele alisebenzise yize sazi ukuthi okunye akwenzekanga ngendlela,” kusho uMiddendorp.
IChiefs isizolungiselela ukudlala nePolokwane City emdlalweni we-Absa Premiership ngoMgqibelo, ePeter Mokaba Stadium ngo-3.30 ntambama.