ISundowns ethubeni lokuqhwakela kwiPSL
KUNGENZEKA yini lithi liqambe lisongwa leli sonto iMamelodi Sundowns kube sekuyiyona eqhwakele esicongweni se-log ye-Absa Premiership?
Uma lokhu kwenzeka iSundowns izobe iqhwakele okokuqala kule sizini, okuyinto engajwayele ukuyidedela uma ike yayithola njengoba ibiyenza ngamasizini adlule.
Ukuze iSundowns izihole phambili kumele iqale ngokuqoqa amaphuzu agcwele uma isibhekene nePolokwane City eLoftus stadium, eTshwane namuhla ngo 7.30 ebusuku.
Lo mdlalo uzolandelwa ezobhekana kuwona neBidvest Wits, eBidvest Stadium, ngoMgqibelo ngo 6 ntambama.
IWits iyona ehambela phezulu kwazise isinesikhathi iqhwakele kanti ne-Orlando Pirates eke yayidlisela ogageni esicongweni ikhombisa izimpawu zokusindwa umbango kwazise iwalahla kulandelana amaphuzu.
Ngemuva kokuthola iphuzu elimqoka ekuhambeni emdlalweni weCaf Champions League ne-Asec Mimosa yase-Ivory Cost, iSundowns izophinde igxilise umqondo wayo ekuqoqeni amaphuzu emidlalweni yeligi kwazise isele emuva.
Nakuba engaphumeli obala uPitso Mosimane, opheka iSundowns, isicoco seligi ngenye yezinto aphupha ngayo kwazise sizombuyisela lapho ethanda ukuba khona minyaka yonke kwiChampions League.
Uma iSundowns ingaphumelela kwiRise and Shine namuhla, ingaqhwakela ngoba izobe isilingana nezikaGavin Hunt ngamaphuzu futhi ngokwezibalo zamagoli amaBrazillians azihambela wodwa.
Ukwenza lokhu ngeke kube yinto elula kwezikaMosimane kwazise ngamasizini amathathu adlule, iSundowns ayikaphumeleli ukushayela iPolokwane ePitoli.
Ngesizini edlule iSundowns ikhale ngaphansi kwiPolokwane ngo 2-1. Nawo lowo mdlalo owabe useLoftus. Ngesizini engaphambili kwalokho babedlale ngokulingana eLoftus, kuba ngu 0-0. Nangaleya sizini emdlalweni wala maqembu owawukuyona le nkundla, iDowns yehluleka ukuqoqa amaphuzu agcwele, kwacazelwana ngoba engekho obona lapho kugxunyekwe ngakhona amapali.
“Kufanele ngabe wonke umuntu useyazi manje ukuthi indaba yokubala amaphuzu ungakadlali yenzanani ebholeni lethu. Ukusala ngemidlalo yinto engathi shu. Simelwe ukunqoba leyo midlalo ngoba ukuba nayo nje kuphela akusho ukuthi sesinamaphuzu esandleni. Angifuni nokuyikhuluma nje leyo ngoba ingaze ingene ezindlebeni zabadlali. Kumele sinqobe futhi siqine ngoba wonke amaqembu asesimweni esikahle njengoba isizini isimi kanje,” usho kanje uMosimane ngemuva komdlalo ne-Asec Mimosas kade ebuzwa ngamathuba akhe esicoco nokunethezeka okudalwa ukusala emuva ngemidlalo.
ISundowns inqobile ekuqaleni kwale sizini ibhekene nePolokwane ekuhambeni, ngamagoli kaRicardo Nascimento noLebohang Maboe. Ngemuva kwalo mdlalo wanamuhla iSundowns izophinde ibhekane nomqansa lapho kuzobe sekufanele izixebulele yona kwiWits.