Kuvela imbangela yokuquleka kukaZimdollar
UKUNGAPHUMULI nokhwantalala yikhona okuholele ekutheni umsakazi woKhozi FM, uZimiphi “Zimdollar” Biyela aquleke e-studio esebenza ngoMsombuluko ekuseni.
Udokotela obehlola uZimiphi kuthiwa umyalele ukuthi aphumule futhi ayeke nokucabanga izinto eziningi ngoba lokho kungaba yingozi empilweni yakhe.
Umyeni kaZimiphi, uMfishimfishi Dlamini, utshele Isolezwe ukuthi usengcono kakhulu ngoba izolo uthole ucingo lokuthi akamlande esibhedlela abekuso eThekwini.
“Ungcono manje useluleme kakhulu. Siyabonga kubona bonke abasixhasile naye belokhu bemshayela ucingo bebheka ukuthi unjani emuva kwalesi simo. Udokotela uthe akaphumule azame ukwehlisa izinto azicabangayo ngoba yizona ezimholele la ekhona manje,” kuchaza uMfishimfishi.
Nayizolo ucingo lukaZimdollar belukhala kodwa lungabanjwa.
UZimdollar uphuthunyiswe esibhedlela isimo sakhe sisibi ngoMsombuluko ngemuva kokuquleka ezindlini zomsakazo eThekwini.
UZimiphi kuvela ukuthi utholwe yithimba lasekuseni labezindaba ebelizongena ewile.
Ngalolo suku wayesakaza uhlelo oluthi Lwasa Olungaliyo olungena ngo-2 luphele ngo-4 ekuseni.
Lesi simo kuvele ukuthi senze kwaba muncu kwabebekhona ngoba uZimdollar wayenganyakazi kunzima ngisho ukuvula amehlo ngesikhathi bemfica.
Kuvele ukuthi ngendlela ayeyiyona kwase kuphuma ngisho amagwebu emlonyeni.