Kuboshwe osolwa ngokuba yinkabi
KUBE nenhlokomo ehostela laseMlaza eGlebelands kulandela ukuboshwa kosolwa ngokuthi ungomunye wezinkabi ebezikhokhelwa ukubulala abantu.
Umsolwa oneminyaka engu30 uboshwe ezihlalele endlini yakhe kulo leli hostela ngeSonto. Kuthiwa amaphoyisa ngaphansi kweCluster yaseThekwini ophiko leTask Team ligasele ngaphansi komkhankaso wabo wokulwa nokubulawa kwabantu kuleli hostela i-Operation Fiela.
Okhulumela amaphoyisa KwaZulu-Natal, uColonel Thembeka Mbele, uthe umsolwa ubhekene necala lokubulala uMnuz Thabani Mjoli (52). “Ngenyanga edlule kwabulawa uMjoli, owatholwa edutshuliwe, enamanxeba ekhanda. Icala lokubulala lavulwa esiteshini saseMlaza. Umsolwa oboshiwe, usolwa ngokubulala uMjoli. Umsolwa uzobekwa icala lokubulala bese evela enkantolo yaseMlaza maduze. Lo msolwa ubefunwa nangamanye amacala okubulala ehostela naKwaMnyandu, lapho kwabulawa khona abantu abane ezigamekweni ezehlukene,” kusho uCol Mbele.
UCol Mbele uthe umsolwa kusaphenywa ukuthi awekho yini amanye amacala athinteka kuwo okubulala nezigameko zodlame.
Umthombo weSolezwe uthe kube nenhlokomo kwezinye zezinhlangothi kuleli hostela ngesikhathi kuzwakala ukuthi umsolwa uboshiwe ngokubulala umuntu.
“Abantu bajabulile ngokuboshwa komsolwa ngoba kusho ukuthi amaphoyisa ayayinqoba impi yemigulukudu ehlala ehostela futhi lokhu kusho ukuthi sesizophepha, sikwazi nokuhamba singajeqezi. Kusijabulisile kakhulu ukuboshwa kwalo msolwa ngoba ubevele esoleka kokuningi lapha. Siyathemba njengoba eboshiwe uzoze agwetshwe inkantolo,” kusho umthombo ocele ukungadalulwa ngoba usaba ukuthi ungahlaselwa ngokuphawula nje.
Icala labayisishiyagalombili labasolwa ngokuba ngongqondongqondo ekubulaweni kwabantu, lona lizobuyela enkantolo ngoMashi 29 nonyaka.