Basola amakhansela athulayo kudliwa umhlaba
I-ANC eMkhandlwini weTheku isola ukuthi kunesandla semfene odabeni lokwenyuka kwesihlava sokudliwa ngo “dli” komhlaba ezindaweni ezingaphansi kwedolobha.
Emhlanganweni wamakhansela alawula umkhandlu eCity Hall izolo, uSihlalo wekomiti lezezindlu, uMnuz Mondli Mthembu, uthe babona sengathi kunesandla esinoboya kulolu daba ngoba amanye amakhansela avele asonge izandla uma ebona abantu ezindaweni zabo bethatha umhlaba ngokungemthetho.
“Uma uyikhansela ubona abantu bephula umthetho, bethatha umhlaba okungewona owabo, singalindela ukuthi ubikele umkhandlu kodwa amanye amakhansela avele azithulele, okwenza sisole ukuthi mhlawumpe nawo anesandla ekuthathweni noma ekudliweni komhlaba ezindaweni zawo,” kusho uMthembu.
Uthe bayabona ukuthi kukhona asebesebenzisa udaba lokuthathwa komhlaba ngokungemthetho ukufeza izinhloso zabo.
“Singase sikhule lesi sihlava ikakhulukazi njengoba sibheke okhethweni ngoba sekunosomathuba abagangayo ngendaba yemikhukhu,” kusho uMthembu.
Uthe le nto yokuthathwa komhlaba ngokungemthetho iphinde igqugquzelwe ngabantu abanezimali abenza inzuzo ngokwakha imikhukhu bayidayise, baphinde baqashise ngayo.
“Laba bantu abangabanikazi bemikhukhu baba nodlame balwe uma kufika amaphoyisa ezobhidliza imikhukhu abaqashise ngayo ngoba basuke bebona ukuthi bazolahlekelwa inzuzo,” kusho uMthembu.
Uthe amaphoyisa azithola esebunzimeni ngoba akulindelekile ukuthi asebenzise indlakadla uma ebhekene nalaba bantu.
“Sesisungule umkhandlu ofaka ama-ward lapho lesi sihlava sande khona kakhulu ngenhloso yokuthola ikhambi lokulwa nale nto,” kusho uMthembu.
Uthe iyabakhathaza le nto yokudliwa komhlaba ngoba iphazamisa intuthuko.
“Uthola ukuthi lapho kufakwe khona imikhukhu kunohlelo lokuletha intuthuko egcina isiphazamiseka ukuthi ilethwe,” kusho uMthembu.