Umndeni uyamazi owabulala owaseDUT
UMNDENI kadokotela obulewe eDUT usuveze ukuthi kwenzeka lokhu nje wayenenhlolokhono yomsebenzi wokuba ngesinye sezikhulu kulesi sikhungo.
UDkt Euvette Taylor (30), watholwa ngeSonto lomhla ka-8 Febhuwari ezindlini ezihlala abafundi eWinterton, enemivimbo eseshonile.
Umndeni kamufi uveze ukuthi bayamazi osolwa ngokuhlasela umufi njengoba babengabangani futhi wayemvakashele ngelanga lesigameko.
Okhulumela umndeni, uMnuz Sabelo Nyawo, uthe badidekile ngokuthi kungani umufi ebulawe ngesihluku esingaka.
“Esikufunayo njengomndeni ukuthola iqiniso ngokuthi kungani umbulali embulale ngesihluku esingaka. Kwenzeka lesi sigameko nje, ngoMsombuluko wayenenhlolokhono yomsebenzi eDUT lapho wayezoba ngesinye sezikhulu futhi kuzoba umsebenzi aqashwe kuwo ngokugcwele. Asingabazi ukuthi wayezophumelela ngoba ubengumuntu okhaliphile. Silahlekelwe kakhulu ngokubulawa kwakhe ngoba ubewukhathalele umndeni nabasondelene naye,” kusho uNyawo.
Elandisa Isolezwe uthe njengomndeni bathole ukuthi umsolwa washaqa impahla endlini kamufi.
“Esikutholile wukuthi wafika nalo mngani wakhe osolwa ngokumbulala bahlala endlini yakhe. Kwafika namantombazane amabili angabangani bakamufi ahlala khona eDUT. Bahlala kwaze kwashaya u-11 ebusuku. Amantombazane abe esehamba eya ezindlini zawo eshiya umufi nomngani endlini. Asazi ukuthi kwenzekani sebesele. Endlini kamufi kwakuthathwe impahla yakhe okubalwa amaTV amabili, ama-laptop nokunye okuningi,” kusho uNyawo.
Uthe bathole ukuthi umsolwa ubonakala kwikhamera (CCTV) yakulesi sikhungo eyofaka izimpahla emotweni kamufi. Ubonakala ehla enyuka kukhona akuthuthayo.
Ekugcineni ubonakala eshaya echitha nemoto kamufi.
Imoto yatholwa amaphoyisa eMlaza. Umndeni uthe yayinezimbobo zokudutshulwa ilahliwe.
Ngokusho kukaNyawo umufi uze atholakale nje ngoba abe-tracker bashayela omunye wesifazane owayenomufi ucingo ebusuku bebuza ukuthi ukuphi umufi nemoto yakhe.
“Kwakumele baye bonke esontweni ngeSonto. Bathuka sebeshayelwa abe-tracker ucingo. Kwathi uma beyobheka bafica endlini kukhiyiwe imoto ingekho. Babiza onogada bazama ukuvula kodwa bathola ukuthi i-gas igcwele endlini. Sisola ukuthi wayezama ukuqhumisa indlu njengoba i-gas yavulwa yabekwa eduze kwesitofu sivuliwe. I-microwave yayivuliwe kwafakwa nezipuni zensimbi ukuze iqhume,” kusho uNyawo.
Uthe kwaba yinhlanhla nje ukuthi indlu ingashi nesidumbu sikamufi.
Umufi uzofihlwa e-Underberg, inkonzo yomngcwabo izoba ngoMgqibelo.
Okhulumela amaphoyisa KwaZulu-Natal uLt. Colonel Thembeka Mbele uthe kusaphenywa, umsolwa akakaboshwa.