Asephinde avalwa amanyuvesi kubhikisha izitshudeni
KUVALWE thanqa ezikhungweni zemfundo ephakeme kulandela imibhikisho yezitshudeni kulezi zikhungo.
Inyuvesi iDurban University of Technology (DUT) imise ukufunda emva kokuthi izitshudeni zale nyuvesi zimashele eCity Hall ukuyodlulisa uhlu lwezikhalo zazo.
Bekulindeleke ukuthi kule nyuvesi kuqalwe ukufundwa ngoMsombuluko ngemuva kokuvalwa kwayo kulandela ukudutshulwa kubulawe uMlungisi Madonsela obeyisitshudeni kule nyuvesi.
Esitatimendeni esikhishwe yile nyuvesi abaphathi bathe ukufunda kumiswe kulandela imashi yezitshudeni eyenzeke ngoMsombuluko. “Yize ukumiswa kokufunda kudumaza kodwa ngeke sibeke impilo yabasebenzi nezinye izitshudeni engcupheni kodwa izinsongo ezenziwa amanye amalungu omkhandlu wezitshudeni sizozithathela phezulu.”
Le nyuvesi imemezele ukuthi ihlanganile nomkhandlu wezitshudeni, i-EFFSC ukudingida ukubhalisa kwezitshudeni kanye nesimo sezindawo zokuhlala zezitshudeni.
“Ithimba likaNSFAS nalo lifikile ukuzoxazulula udaba lwezitshudeni ezingu-600 ezingakabhalisi, inyuvesi neNSFAS izokwazi ukuqedela konke okuqhubekayo ngoLwesihlanu.”
Kuphinde kwamenyezelwa ukuthi kuthunyelwe ithimba elinamalungu aphuma kule nyuvesi kanye nomkhandlu wabafundi ukuthi liyohlola izindawo zokuhlala zezitshudeni. Umbiko obuye naleli thimba uzohlaziywa maduze.
Lesi sitatimende siphinde sadalula ukuthi umkhandlu wezitshudeni ukuphikile ukuthi kuqalwe ukufunda ngoMsombuluko ekubeni kwakunguMengameli walo mkhandlu uSesiyanda Godlimpi owaphakamisa lelo phuzu.
Le nyuvesi ixolise kubasebenzi nezitshudeni ezithintekayo ngalezi zigameko.
“Sizoqhubeka sisebenze ngokuzimisela ukuze isimo sibuyele kwesejwayelekile.”
Akusona lesi sikhungo esimisiwe kuphela kodwa kumile futhi ukufunda enyuvesi iMangosuthu ngemuva kombhikisho obunodlame kule nyuvesi.
Kuboshwe izitshudeni eziyisishiyagalolunye ngemuva kokuthi kuketulwe imoto ngesikhathi kubhikishwa.
Le nyuvesi ikhiphe isitatimende iluleka izitshudeni ukuthi zishiye le nyuvesi nemithwalo yazo, izolo lingakashayi ihora lesine ntambama.
Izitshudeni eziyisishiyagalolunye zivele eNkantolo yeMantshi eMlaza izolo.
Kwesinye isehlakalo esifanayo, kuvalwe i-University of Zululand (Unizulu) ngemuva kombhikisho wezitshudeni obunodlame lapho kushiswe khona imoto.
Esitatimendeni esifakwe enkundleni yokuxhumana iFacebook le nyuvesi itshele izitshubeni ukuthi lungapheli usuku lwangoMsombuluko bengahambile kulesi sikhungo.