Ukuzala ingane uyilahle akusoze kwaba yisisombululo
NGESONTO eledlule kutholakale usana epayipini lesitamkoko eNewlands East, eThekwini. Ngenhlanhla lutholakale lusaphila yize beluvaleleke esitamkokweni okungaziwa ukuthi bese lunesikhathi esingakanani lukusona.
Luphuthunyiswe esibhedlela kanti ngokusho kodokotela yonke into ihamba kahle ngempilo yalo. Kuleli sonto owesifazane olahle usana olwatholwa lusenomzanyana uboshiwe.
Kuthe kusabatshazwa lokho, ngoLwesihlanu kwavela izindaba zokuthi kunomama oboshiwe esibhedlela eKing Edward VIII ngoba elahle ingane yakhe emgqonyeni.
Owesifazane ubegcinwe wumhlengikazi encelisa ingane nokuthe emva kwesikhashana wabonakala engasayiphethe kanti useyigoqe ngoplastiki nangomqamelo wayifaka emgqonyeni okulahlwa kuwona izinaliti. Nale ngane odokotela bayihlengile.
Izizathu ezenze bakhetha ukulahla izingane zabo azikaziwa ngoba nalona okuthiwa ubenza akutshelwe yisoka lokho akukaqinisekiswa nguye mhlawumbe kuzocaca uma eseziphendulela enkantolo.
Kodwa okucacayo ngabo wukuthi kunezimo ababhekene nazo abathe uma bezibheka babona ukuthi kuzobahlula ukukhulisa izingane.
Akusikho okwethu ukwahlulela umuntu uma enquma ukungayikhulisi ingane ayilethe emhlabeni kodwa sifisa ukugqugquzela abesifazane abazithola bekulesi simo ukuthi basebenzise izinhlaka ezikhona ezingabalekelela ngendlela ehlelekile, ehloniphekile ngaphandle kokuthi babeke impilo yabantwana engozini.
Kunamakhaya azamukelayo izingane ngaphansi koMnyango wezokuThuthukiswa koMphakathi, kukhona abantu abaye bafise ukuzithatha izingane ezingenabani bazikhulise njengezabo.
Ngokulahla ingane usuke uphula umthetho nokusho ukuthi ungagugela ejele isidingo singekho.
Enye indlela yokugwema ukuba nengane ongazimisele noma ongenawo amandla okuyondla wukuhlela umndeni nakho okuhlinzekwa nguhulumeni mahhala ukuze ugweme ukukhulelwa ongakuhlelele. Nokuhushulwa kwesisu kusemthethweni ezikhungweni zezempilo eNingizimu Afrika.