Kubhikishwa nje yizinqumo zikaZuma
MHLELI: Owayengumengameli wezwe uMnuz Jacob Zuma wajabulisa abaningi ngesikhathi ememezela ukuthi sesikulungele ukuba nemfundo yamahhala emazingeni aphakeme.
Mina njengesakhamuzi esihlaziya ukuhlala kwami nokuphila kwami eNingizimu Afrika ngafikelwa umbuzo othi izophumaphi le mali yemfundo yamahhala? Ngabe sesikulungele yini ukuba kuleso sigaba sokuba neyamahhala? Kodwa ngavele ngathi ohlaba eyakhe akaphikiswa.
Lokho kwakusho ukuthi uyakwazi ayekwenza uZuma. Njengoba imibhikisho ilekanyana ezikhungweni zemfundo futhi kuyizinkomba zokuthi besingakulungeli ukuthola eyamahhala.
Sekuyinsakavukela umchilo wesidwaba ukubona imibhikisho nokubulawa kwabafundi abafuna abakuthenjiswa inhlangano ebusayo.
Okungikhathaza kakhulu yileli gazi eligobhozayo uma kubhikishwa kanye nababoshwayo. Kuseyiyo eyamahhala njalo Zuma? Okufanele kwaziwe abaholi bethu ukuthi abangalinge bethathe izinqumo ngabodwana ngoba lokho kuba nomthelela omubi njengalona wemibhikisho. Mina umunwe wami ukhomba ubudedengu bukaZuma ngolwemibhikisho yasezikhungweni zemfundo ephakeme. Wayethi iyothathwaphi imali ekubeni abantu abakhokha intela abasebenzi?
Kunjena nje yizinqumo zikaZuma. UZuma nethimba lakhe kumele bazi ukuthi leli gazi elichitheka emanyuvesi liyobuzwa kabo.
Okuhlalele uMengameli Cyril Ramaphosa nethimba lakhe ukuvimba amanzi ukuba engangeni endlini ye-ANC. Ukubonisana nokukhipha izinqumo eziphusile komphathi wezeMfundo uNkk Naledi Pandor kuzodambisa udlame ezikoleni bese elungisa le nhlekelele yakwaNSFAS. Khabzela “KB “Mzimela EZWELIBOMVU