Ningavumi ukufeyiliswa ngabamanzi eGoli
MHLELI: Kwelakho ngithi mangikhumbuze amakhansela ethu esawavotela eGoli ukuthi kumele asukume alwele inhlalonhle yabantu.
Ngiyaye ngiyithande inkulumo yoMntwana waKwaPhindangene inkosi uMangosuthu Buthelezi nxa ethi masigxeke lapho kufanele khona futhi sigxeke ngenhloso yokwakha.
Ngithi kuhulumeni wobambiswano osewenze izinto ezinhle eziningi uzama ukulungisa iGoli nize ningavumi ukufeyiliswa yiJohannesburg Water. IJohannesburg Water ayizisukumeli ngendlela izikhalo zomphakathi. Ushaya ucingo kanzima ngemali yakho uyisakhamuzi uze uthole ne-reference number kepha dololo ukusizakala uma unenkinga.
Ngiyisakhamuzi esikhathalele umphakathi nezwe laso ngazi kahle ukuthi ingqalasizinda yamanzi isindala amapayipi abolile futhi ningene kulo hulumeni wobambiswano vele kukubi kepha phela abafike balungise lapho ababizelwe khona, hhayi ukuthi kwehlule ngisho usunikwe amareference number ayinqwaba.
Lona ibhodi lalolu hlaka lithini uma kwenzeka kanjena?
Uyazi le nto yokuvuza kwamanzi ageleze emgwaqweni iyawulimaza ngisho umgwaqo. Okusho ukuthi ngenxa yokunganakwa kokunye kulimala okunye.
Ngithi ake bathathe isifundo kwiJRA (Johannesburg Roads Agency) kaNonhlanhla Makhubu. Bona kuthi uma ubabizile ngenkinga ethile bafike balungise futhi bayakwazisa nawe nxa behlangana nezingqinamba wena muntu obashayele ucingo.
Ngithi kuningi okwenziwe wuhulumeni wobambiswano kuhle siyabonga. Kodwa ngicela ukunixwayisa ngokuthi qaphelani ukuthi okuhle enikwenzile kungacishwa yile nto eyenziwa yiJohannesburg Water, okungacaci ukuthi yini inhloso yayo. Mabayeke ukusukumela izinkinga ngesikhathi esithandwa yibona.