Ufisa ukukhula emculweni uDJ Chofy
UNETHEMBA lokuthi ngelinye ilanga umculo wakhe uzonakwa ngisho emisakazweni emikhulu uSmangele Mbatha odume ngelikaDJ Chofy ezindaweni zobumnandi.
Ngesonto eledlule ingoma yale ntokazi eyikhiphe ngonyaka odlule ethi Asiyindawo idlale okokuqala ezinhlelweni zomculo esiteshini sakwaDStv.
UDJ Chofy uthe uma kukhulunywa ngobunzima bokungena endimeni yobumnandi yinto ayazi kahle leyo.
“Le ngoma ngiyikhiphe ngonyaka odlule kodwa kwaba nzima satshe ukuthi ingene emsakazweni ukuze idlalwe. Angiphelanga amandla bengizama ukuthi la ngihamba khona ngiyiphushe yaze yaduma ezindaweni zobumandi nozakwethu bangixhasa. Ngawo unyaka odlule ngibone kungcono ukuthi ngenze i-video yayo yize bengingenathemba lokuthi izodlalwa nangempela kwenzeka lokho kodwa ngazitshela ukuthi ngeke ngiyeke. Ngiyihambisa bangitshela ukuthi ngeke besayithatha ngoba sekuqala isikhathi samaholidi izingoma ezintsha bazozithatha uma kuqala unyaka,” kuchaza uDJ Chofy.
Uthe ukuyibona le ngoma idlala kumenze wabuyelwa yithemba njengoba ekupheleni kukaMashi ezokhipha enye ingoma ethi Shampompo.
Uthe le ngoma eyesine njengoba elokhu aqala ukuzikhipha kusukela ngo-2014.
“Ngiyafisa ukukhula nami kodwa kukhona konke akukho okudlula ukusebenza kanzima. Ngiyafisa ukusebenza nabantu abafana noBlack Coffee, Black Motion, Mpumi kulo mkhakha ukuze ngikhule.”
Uthe esinye isifiso sakhe wukuthi abe nestudiyo lapho ezoqopha khona abantu besifazane futhi abasize ekuthuthukiseni umculo wabo njengoba ebonile ukuthi akulula.