Uyashiya obevelele kwiGenerations
UZOGCINA ukubonakala kwiGenerations: The Legacy ngoEphreli 27 uChi Mhende, obelingisa indawo kaWandile kulo mdlalo.
Le ntokazi yaseZimbabwe yadida abaningi ifika kulo mdlalo ababecabanga ukuthi ingumuntu wesilisa, okwagcina ngokuthi kuvele ukuthi ingumuntu wesifazane.
Kuvele izindaba ezithi uChi useyawushiya umdlalo ngemuva kokukhonjwa indlela ngoba indawo ayilingisayo ingasathandwa ngabaningi futhi sekuhlala kungena izikhalo ngayo.
UChi, ogxile kakhulu emidlalweni yasesiteji, uqale ukulingisa kwi-Generations ngo2015.
Okhulumela iGenerations, uGaaratwe Mokhethi, uthe le ntokazi iyohlala isemabhukwini omlando ngendawo eyilingisile emdlalweni wabo.
“Yebo, uyagcina maduzane kodwa ngeke ngize ngande ngokuthi yini eholele ekutheni kuze kufikwe lapho osekukhona manje.
UChi ngomunye wabalingisi abenze lo mdlalo wavusa ilukuluku kwabaningi njengoba indawo yakhe ibihlale ikhulumisa futhi abanye befuna ukubona isiphetho ngayo,” kusho uGaaratwe.
Uthe akugcinanga nje lapho kodwa wadida abaningi uChi sekuvela ukuthi ungumuntu wesifazane yize kwaqala kwabonakala sengathi ungowesilisa.
‘’Simfisela konke okuhle emkhakheni wokulingisa akuwo. Siyazi ukuthi uzoqhubeka enze okuhle,” kuchaza uGaaratwe.
Imizamo yokuthola uChi ukuzwa ukuthi yini esingayilindela kuye njengoba eseshiya kulo mdlalo, ayiphumelelanga. Ucingo lwakhe belukhala lungabanjwa.
Kodwa ekhasini lakhe le-Instagram ulokhu eqhubekile nokufaka izithombe eziveza elingisa emidlalweni ehlukene yasesiteji.