Osolwazi abazofakazela uCaster Semenya
LUPHUMILE uhla losolwazi abayisishiyagalolunye abazofakaza ohlangothini lomgijimi uCaster Semenya uma esebhekene ne-International Association of Athletics Federations (IAAF) kubangwa umgomo wayo ozomphoqa ukuthi adle amaphilisi okwehlisa i-testosterone uma esazimisele ngokugijima amabanga awajwayele.
USemenya ungumpetha womhlaba nowama-Olympic ku-800m. Ubuye agijime ku-400m naku-1 500m okungamabanga i-IAAF ethi abagijimi besifazane imizimba yabo ekhiqiza i-testosterone engaphezulu komthamo owejwayelekile kumele bayehlise ngokusebenzisa imishanguzo.
Icala elifakwe nguSemenya lilalelwe ekomkhulu leCourt for Arbitration of Sport (CAS) eLausanne, eSwitzerland, kusukela ngoMsombuluko kuya kuLwesihlanu. Kulindeleke ukuthi isinqumo siphume ekupheleni kukaMashi.
Izolo ithimba labameli bakaSemenya likhiphe olwalo uhla longoti abazofakaza lilandela i-IAAF ekhiphe eyalo ngoMsombuluko.
“USemenya ukholwa wukuthi yena nabanye besifazane abathintekayo yile migomo kumele bavunyelwe ukugijima nabanye besifazane ngaphandle kokucwaswa futhi kufanele babujatshulelwe ngethalente labo lemvelo njengabo bonke abagijimi abadaleke ngezindlela ezehlukile,” kusho isitatimende sabameli izolo.
Siqhube sathi imigomo ye-IAAF iyacindezela.
“Iveza enye indlela engaqondile nebuhlungu yokulawula ubulili babagijimi besifazane. Isibindi sikaSemenya nokubekezela ukulwela ukugijima ngenkululeko kukhuthaza nabanye abagijimi abasebancane ezweni lakhe iNingizimu Afrika nasemhlabeni. Ithimba longoti elizimele lizoveza ulwazi olunzulu leseka uSemenya ngobufakazi.”
Ongoti abazofakaza basebenzela izikhungo zemfundo ephakame emazweni ahlukene. Kukhona abasebenza ngokwengqondo, nalabo abafunde bagogoda ngokwakheka kobulili.
Elinye iphuzu elibukeka lizophosela abameli be-IAAF inselelo enkulu yisinqumo sale nkantolo eyavuna ngaso umgijimi waseNdiya webanga eliwu-100m uDutee Chand, naye owayebhekene nenkinga efana nekaSemenya.
UChand, owaphumela obala waseka uSemenya waze wameluleka ngokuthi asebenzise ithimba labameli bakhe.
Yathi ngesikhathi yona iphikisa isinqumo se-IAAF yabe ingazi lutho kumnyama ngoba yayiyintombazanyana ekhulele emakhaya eyayazi ukuzilolonga nokuqhudelana nabanye kwezejubane.
“Ngenhlanhla kaSemenya kuyena ngeke kufane nokwami ngoba vele usengumpetha futhi useqinile ngokomqondo.
Abazofakazela uSemenya woMadeleine Pape, Solwazi Ross Tucker, Solwazi Wayne Derman, Dkt Jeroen Swart, Solwazi Carl Lombard, Dkt Ariane Spitaels, Solwazi Mark Engel, Solwazi Joel Dave noSolwazi Marc Blockman