IBaroka ifake isicelo kwiBay ifuna ukuthola uMadondo
INJINI yeRichards Bay FC, uKhulekani “Chillies” Madondo, kuvela ukuthi ifunwa uthuli yiBaroka FC engompetha beTelkom Knockout, edlala ngaphansi kwesigaba i-Absa Premiership.
Ngokuthola kweSolezwe akukhona nje kuphela ukuthi iBakgaga Ba Mphahlele igcina ngokuhlabelela ngezifiso zayo ngoMadondo kodwa isifake nesicelo esisemthethweni kwiBay, sokuba ibadedelele lo mdlali.
UMadondo uzakhele igama kwiMaritzburg United, AmaZulu nePlatinum Stars edlala ibhola elinenkosi phakathi enkabeni yesisu. Kuke kwaba khona nesikhathi lapho izinkunzi zaseSoweto, iKaizer Chiefs bezimnyonyobela lo mdlali odabuka eMgungundlovu eminyakeni eyedlule kodwa kwagcina kungahlangananga.
UMadondo wenza okulula enkundleni njengoba efike elimake ibhola, athi engalinqoba bese ephasa. Lokhu kudlala kwakhe kumphendula isithandwa kubaqeqeshi abaningi, abangafune mjiko kumdlali wasesiswini olekelelana nodonga lwasemuva.
UBrendon Truter, opheka iBay ukuqinisekisile kwiSolezwe ukuthi impela iBaroka isingqongqozile amahlandla ambalwa emahhovisi aleli qembu, izikhalela ngoMadondo.
“Yebo kuyiqiniso ukuthi bayamfuna uMadondo. Ngaphandle nje kokuthi iwindi livalile, ngeke ahambe manje ngoba sifuna ukuthi aqede isizini nathi.
“Ngikhathazekile nokho ngokuthi hleze angase aphazamiseke ngokomqondo ngenxa yokufunwa yiBaroka kodwa cha okwamanje azikho izimpawu asezikhombisile. Ngizwile kukhulunywa ngezindaba zokuthi usayine i-pre-contract neBaroka kodwa angiboni ukuthi kuyiqiniso lokho ngoba ngabe usitshelile lapha eqenjini,” usho kanje uTruter izolo emini.
Usihlalo weNatal Rich Boys uSifiso “Jomo” Biyela, uvumile ukuthi uMadondo ufunwa iBaroka, kodwa wathi akuyona kuphela emfunayo. “Maningi amaqembu afuna uMadondo akuyona kuphela iBaroka emfunayo. Ngibe nengxoxo naye (uMadondo), ngimchazela ngezinto esizilindele kuyena, nesimo se-log yeNational First Division njengoba sifuna ukuthola indawo kuma-play offs okukhuphukela kwiPremiership. Sizwanile naye saba nezivumelwano, ngakho angikhathazekile nakancane ngabamfunayo.
“Ngaphandle nje kwalokho iwindi lokudayisa abadlali livaliwe, futhi unenkontileka nathi okufanele ayihloniphe,” usho kanje uBiyela.
Ebuzwa ngamahebezi okuthi uMadondo usayine inkontileka yesibambiso neBaroka, uBiyela uthe: “Lokho akusilona nakancane iqiniso.Lokho besizokwazi ukube kwenzekile. UMadondo uyazazi ukuthi ufunani, nathi njengeqembu siyazazi ukuthi sifunani.”