Uzolimala uFassie kubuya uBosch ekulimaleni
UKULULAMA kwesilomo samaBhokobhoko esinguCurwin Bosch kuza nezindaba ezingemnandi ku-Aphelele Fassi, ongene emdlalweni odlule wakhombisa izimpawu zokuba yinkunzi eqenjini laseThekwini, iCell C Sharks edlala okokuqala ekhaya ne-Auckland Blues ngo-3 ntambama. Lo mdlalo ngaphansi kweVodacom Super Rugby uzodlalelwa eKings Park Stadium.
Indawo okudlala kuyo uBosch iyona le edlalwa nguFassi, kodwa naye usamiswe kabi nguLwazi Mvovo.
Okucacile ngoFassi engena esiwombeni sesibili, iSharks inqoba kwiSunwolves, wukuthi usazokuba ngolukhulu usizo kuleli qembu likaRobert du Preez.
Yize kunjalo kusazofanele alinde lo mdlali osemncane ngoba uBosch unesipiliyoni futhi naseqenjini lesizwe uyabizwa uma sikhona isidingo nakhona futhi afike agqame.
Ukulithinta okokuqala kukaFassi eSingapore, kushiye abaningi bekhexile ngendlela alinqake ngayo ibhola wase ekhipha uswidi wephasi owele kuJeremy Ward eshaya i-try yesithupha benenebula leli qembu laseJapan abavule nalo isizini entsha.
Ngaphandle kukaBosch, iSharks izokwamukela noMarius Louw naye obelimele kodwa yena angase aqale ebhentshini emdlalweni weBlues.
Indlela iSharks eqale ngayo ifakele leli qembu okukhulu ukuzethemba ngoba ihlukile kunejwayelekile. ISharks isiyaziwa ngomkhuba wayo wokuqala kancane, ifudumale maphakathi nesizini. Esikhathini esiningi bathi abalandeli sebeqala bebuyelwa ukuzethemba kuphinde kubekhona okungathi yisifo lapho idedela khona amaphuzu alula ekhaya. Umqeqeshi uDu Preez uthi siphelile isikhathi salokho manje. “Okusemqoka ukugcina umgqigqo. Ngiyazi ngeke siyinqobe yonke imidlalo kodwa kule sizini uma sihluliwe kuzobona wonke umuntu ukuthi sihlulwe yiqembu elingcono. Kumasizini adlule bekuba yithi esiwasizayo amaqembu ukuthi asithwalise kanzima kumbe asihlule ikakhulukazi ekhaya. Kule sizini ukudlalela ekhaya yikhona esizokusebenzisa kakhulu ukuqoqa amaphuzu,” usho kanje. Lo mqeqeshi uyaqonda ukuthi iBlues ikhombisa izimpawu zokubuyelwa wudumo lwayo njengoba ibhincisele nxanye iCrusaders emdlalweni wokuqala. Bekufanele iBlues inqobe lapha kodwa amaphenathi alula ayihlule ngasekugcineni ayihlinzele ezibini.
“Ngeke siyizele ngobuso iBlues ngoba nakhona eNew Zealand kuyakhulunywa ukuthi le kungase kube isizini yayo ebuyisa ngalo udumo lwayo,” kusho uDu Preez.