Umndeni ufuna iqiniso ngokwaholela ekufeni kwesihlobo
UMNDENI womshayeli wetekisi ufuna ukuthola iqiniso ngokwaholela ekubulaweni kwakhe emuva kokuboshwa kwabasolwa ngokuba izinkabi.
UMnuz Sbusiso Mbotho (27) wabulawa ngo-Ephreli 5 eDududu, eScottsburgh.
Itekisi ayeyishayela ngesikhathi ebulawa yathathwa ngabahlaseli.
Amaphoyisa abophe amadoda amabili asolwa ngokuba yizinkabi azobekwa, ngokusho kokhulumela amaphoyisa KwaZulu-Natal, uColonel Thembeka Mbele, icala lokubulala.
“Amadoda amabili aboshwe eMzinto ngecala lokubulala umshayeli wetekisi. Avele enkantolo yemantshi eScottburgh ngoMsombuluko, icala lahlehliselwa u-Ephreli 24,” kusho uCol Mbele.
Amadoda aneminyaka ewu26 no-28 aboshwe ezindaweni ezehlukene eMalangeni, eMzinto, esolwa ngokuthi ayizinkabi ezithunywa ukubulala abantu embonini yamatekisi.
Enye indoda itholwe nesibhamu nezinhlamvu eziyisithupha.
Umfowabo kaMbotho, uMnuz Sihle Mbotho, uthe bathemba ukuthi sekuzovela konke okwaholela ekubulaweni komfowabo.
“Besisadidekile ukuthi kungani umfowethu abulawa ngoba ubengumshayeli wetekisi nje. Ukuboshwa kwabasolwa kuyasijabulisa ngoba sesizothola iqiniso ngokuthi kwenzekani nokuthi kungani umfowethu bambulala,” kusho uMbotho.
Uthe umfowabo yize ebengaganiwe kodwa ushiye izingane zakhe eziyisishiyagalombili.
Uthe bazolihambela icala kuze kube liyaphothulwa njengoba liqhubeka enkantolo.
Khonamanjalo uSiphumelele Petros Gumede (27) ugwetshwe iminyaka emihlanu ngecala lesibhamu nezinhlamvu enkantolo yaseNsimbini, eFolweni, ngeledlule.
UGumede waboshwa ehostela laKwaMakhutha ngo-Ephreli 2018 emuva kokutholwa nesibhamu i-9mm nezinhlamvu.
UGumede ubebhekene nelinye icala lokubulala elenzeka eMbumbulu ngo-Okthoba 2017. Umnuz Sthembuso Hlongwa (63) wadutshulwa, isidumbu sakhe sashiswa. Wayengumnikazi wamatekisi endaweni.