Wenabe ngokunyuswa kwezikhundla emaphoyiseni
OWAYEYINHLOKO yoPhiko lwe-Independent Police Investigative Directorate (Ipid) uMnuz Robert McBride utshele ikhomishini ephenya ngokulawulwa koMbuso yidlanzana ukuthi emaphoyiseni kunyuswa izikhundla zobhululu babathile.
Uthe amaphoyisa asebenza ngokuzikhandla awanyuselwa izikhundla kodwa kuvele kunyuswe ezamaphoyisa amancane angawazi kahle umsebenzi ngoba ewobhululu babantu abathile.
“Ukukhushulwa kwezikhundla emaphoyiseni akwenzeki ngendlela ehlelekile. Uma uke wazama ukulwa nalo mkhuba wokunyuselwa kobhululu babathile ezikhundleni uyakhishwa emsebenzini wakho. Kuze kufakwe nepolitiki,” kusho uMcBride oveze ukuthi owayenguNgqongqoshe wamaPhoyisa, uMnuz Nathi Nhleko, wayegxambukela emsebenzini wakhe.
Uthe amaphoyisa asebenza ngokuzikhandla nazinikele kulo msebenzi awakhushulelwa ezikhundleni kodwa kunyuswa lawo angazi lutho.
“Abaphenyi be-Ipid babengakwazi ngisho ukulala emizini yabo ngoba babehlale belandelwa, amaselula abo ayelalelwa ngabathile ngesikhathi bephenya owayenguKhomishana wamaphoyisa owayebambile uLt
General Khomotso Phahlane. Ngangiphila kanjena ngesikhathi ngiyisishoshovu esilwa nobandlululo kodwa abaphenyi be-Ipid baphiliswa kanjena yize izwe libuswa ngentando yabantu.”
Uthe wacela uMqondisi Jikelele woPhiko lwezobuNhloli, uMnuz Arthur Fraser, ukuthi axazulule udaba lokungasebenzisani kwezinhlaka zomthetho.
Uveze ukuthi kwaba nomhlangano owawuhlelwe uFraser, kuwona kwakukhona uPhahlane nowayenguMqondisi wezokuShushisa kuzwelonke u-Adv Shaun Abrahams nowayephethe iSouth African Revenue Service (SARS) uMnuz Tom Moyane.
UMcBride uthe wacela kozakwabo ukuthi basebenzele ukuqinisa ezokuphepha ezweni bayeke ukulwa kodwa akukho okwashintsha ngoba konke ayekhala ngakho kwakuqhubeka.
“Ngabikela owayenguNgqongqoshe wamaPhoyisa uMnuz Nathi Nhleko izingqinamba engangibhekene nazo kodwa wathi akathandi ukukhuluma nami,” kusho yena.
Uthe wayesetshenziswa kabuhlungu ngoba kwaze kwaqashwa oKlebe ukuthi baphenye yena, uNgqongqoshe wamaBhizinisi kaHulumeni uMnuz Pravin Gordhan nesinye sezikhulu zakwaSARS uMnuz Vlok Symington.
“Angazi ukuthi icala lokuphazamisa ukusebenza komthetho esasibekwe lona sinoMathews Sesoko no-Innocent Khuba laliwuphazamisa kanjani uhulumeni njengoba sase sigadwa woKlebe.”
Uthe abaphenyi be-Ipid babebekwa amacala uma bephenya izikhulu zamaphoyisa.
Uveze ukuthi esanda kubuya emsebenzini ngo-2016 owayeyiNhloko yoKlebe eGauteng, uMnuz Prince Mokotedi, wambeka amacala okuketula uMbuso.
Icala lokuketula uMbuso lalibekwe uMcBride, uMnuz Shadrack Sibiya owayephethe oKlebe eGauteng nomphenyi ozimele uMnuz Paul O’Sullivan.
UMcBride uveze ukuthi uMokotedi waphinde wamtshela ukuthi umbeke amacala ngenxa kaMnuz Mthandazo Ntlemeza owayephethe oKlebe kuzwelonke.
Uthe u-O’Sullivan wabekwa icala ngoba wayesiza i-Ipid iphenya uPhahlane.
Khonamanjalo iJaji uZondo lisichithile isicelo sikaMoyane sokupheka ngemibuzo uGordhan ethi uzoqale abuke izitatimende zabo ezibhalwe phansi.
NgoLwesine kulindeleke ukuthi kufakaze owayeyiNhloko yoKlebe KwaZulu-Natal uMnuz Johan Booysen.