I-Africa’s Travel Indaba izoheha iningi
SEKUMI ngomumo ngombukiso omkhulu wezokuvakasha eThekwini, izolo okuvezwe abanye osomabhizinisi abancane abazokhangisa kuwo.
Bangu-10 osomabhizinisi abethulwe izolo kwabezindaba, abaqeqeshwe yiTourism KZN (TKZN), abazokhangisa kwiAfrica’s Travel Indaba eqala ngoMeyi 2 kuya ku-4. Labo somabhizinisi baqeqeshwe ngaphansi kohlelo lokucija nokuthuthukisa osomabhizinisi abancane.
UNksz Nomonde Buthelezi weRomaflo Travel eNewcastle, uthe kuzobe kungokwesibili eyingxenye yalo mbukiso. Wabhalisa ibhizinisi lakhe ngo-2016 eligxile ekusizeni abafuna izinsiza zokuvakasha. Ubaxhumanisa nabamabhizinisi okuthutha, awokulala namanye ahlobene nezokuvakasha.
“Ngasebenzisa imali yami ebengizibekela yona ukuqala ibhizinisi. Okuhle ngalo ukuthi akudingeki ngibe nezinto zami ngoba mina ngisiza
ukuxhumanisa amakhasimende kwezokuvakasha,” kusho uNksz Buthelezi. Uthe kumsizile ukuba ngaphansi kohlelo lokuqeqeshwa yiTKZN. Uthe ngesikhathi ethamela umbukiso okokuqala, wayengenayo ngisho i-business card kodwa kumsizile ukuqeqeshwa, wakwazi okudingeka ebhizinisini.
UNksz Mbali Msomi weLeisure Holidays eThekwini, uthe ibhizinisi lakhe ligxile ekuheheni izivakashi ukuthi zize esifundazweni. Uthe ubuye asebenzisane nabamanye amazwe ukubakhombisa okuhle okwenzeka esifundazweni, nabo baveze okwabo. Waqala ngo-2017 kuleli bhizinisi, wathamela umbukiso ngonyaka odlule. Uthe uzimisele ukuheha izivakashi eziningi nonyaka, azozikhombisa kulo mbukiso ukuthi kumnandi kanjani KwaZulu-Natal.
OyiGeneral Manager yezokuThuthukisa ezokuVakasha eTKZN, uMnuz Nhlanhla Khumalo, uthe bayaziqhenya ngalabo somabhizinisi ababakhethe kulo nyaka. Uthe abanye babo sebeke bawuhambela lo mbukiso phambilini kodwa kuningi okushintshile ngamabhizinisi abo.
“Kulolu hlelo iyahluka indlela esiqeqesha ngayo osomabhizinisi. Abanye basuke bedinga unyaka owodwa, kuya ngokuthi umuntu simthole ekuliphi izinga ngokwebhizinisi. Okubalulekile ukubahlomisa ngamakhono, ukubaxhumanisa nabanye osomabhizinisi, bangene nasezimakethe,” kusho uKhumalo.
Uthe leli bhizinisi lezokuvakasha lineminxa eminingi, yingakho kubalulekile ukuthi osomabhizinisi abancane baqeqeshwe. Ulinganisa ngabanezindawo zokulala, athe kumele bafundiswe ukuphatha izivakashi.
UKhumalo uthe bakhethe abangu-10 kodwa bakhona abanye abasaqeqeshwa. Uthe bayawavula amathuba ukwamukela abanye kodwa kudingeka ibhizinisi eselibhalisiwe.
Kulindeleke abazokhangisa abavela kuzo zonke izifundazwe nezivakashi ezingaphezu kuka-7 000 kulo mbukiso.