Asikweseki ukuziphatha kwamaphoyisa
NGOMSOMBULUKO kunamaphoyisa abebhikisha esakhala ngesinqumo somqashi sokukhuphulela ezikhundleni amaphoyisa athize kwathi amanye, iningi lawo azinze eziteshini zamaphoyisa futhi asebe ngo-constable isikhathi eside, ashiywa ngaphandle.
Amaphoyisa, abebhikisha eThekwini, abezimisele ngokuhambisa uhla lwezikhalo kuKhomishana wamaPhoyisa KwaZulu-Natal, uLtGeneral Nhlanhla Mkhwanazi, eCity Hall.
Kodwa kuthe uma efika eCity Hall engamfici uMkhwanazi futhi kungekho muntu ovela ehhovisi lakhe adlulela kwekomkhulu leSAPS eThekwini emgwaqweni uBram Fischer lapho kuthiwa kusuke uthuli lwezichwe kwagcina kukhona amaphoyisa aboshwayo.
Nakuba kungacaci ukuthi mangaki agcine eboshiwe kodwa okugcine sekuqinisekisiwe wukuthi elilodwa liboshelwe ukwenza umonakalo empahleni kwathi amanye aboshelwa ukuphula imigomo yemvume ebiwagunyaza ukuthi ahlanganyele futhi ahambise uhla lwezikhalo zawo.
Ngokwemvume bekumele asuke kuBotha agcine eCity Hall. Ngokudlula eCity Hall ayohlanganela kwekomkhulu leSAPS abesephula umthetho.
Ngokomthetho olawula ukusebenza kwabasebenza umsebenzi obucayi, okubalwa kubo namaphoyisa, amalungu eSAPS awavumelekile ukuteleka. Yingakho ngokomqashi isiteleka besingekho emthethweni.
Amaphoyisa abeteleka angamalungu enyunyana entsha iSouth African Police and Allied Workers’ Union (Sapawu). Ngokwemithombo yephephandaba amaningi abebike ukuthi awezi emsebenzini ngoba engaphilile.
Sesike sasho phambilini ukuthi ziyezwakala izikhalo zamaphoyisa futhi umqashi kumele asibuyekeze isinqumo sakhe. Kodwa asikweseki ukuziphatha kwamaphoyisa ngoMsombuluko ngoba uma abantu okuyibona okumele balawule umthetho ezweni kuzoba yibo abawuphulayo isidana kusho ukuthi konakele futhi umthetho ufana nento engekho eNingizimu Afrika.
Kuyishwa nokuthi izinyunyana zamaphoyisa sezihlukene phakathi ngalolu daba. I-Popcru neSapu ayiyingeni lena eyenziwa iSapawu. Lokhu kuzokwenza umqashi aqhubeke nokubahlukanisa phakathi ngoba kwabona bebodwa abakhulumi ngezwi elilodwa.