Kulimaza i-ANC ukugxekana kwabaholi
Okhathazekile MHLELI: Bengithanda ukudlulisa isicelo sami kubaholi be-ANC. Siyazi sonke njengabantu baseNingizimu Afrika ukuthi ukhetho seluseMome wonke amaqembu ezepolitiki ayayididiyela aze ajube izingqalabutho zawo ukuba ziyoshela abalandeli ukuba bazivotele.
Ne-ANC siyayibona yehla yenyuka ebuholini obusha bukaMengameli Cyril Ramaphosa ikhipha osondonzima bayo ukuba bayoyinxenxela izakhamuzi ukuba ziphinde ziyiphe elinye ithuba lokulungisa isimo sezwe. Okubuhlungu kakhulu yizindaba ezingezinhle ezilokhu ziqhamuka abaholi bayo begxekana esidlangalaleni. Lo mkhuba usuphenduke insakavukela umchilo wesidwaba. Lokhu kwaqala ngesikhathi owayeyilungu le-ANC, uMnuz Bantu Holomisa, ehlubuka kwi-ANC ngo-1994 esungula i-UDM washiya enaphaze abaholi abaningi ebasola ngenkohlakalo. Kuthe sekuphethe uMsholozi izinto zaba mapeketwana abaholi belokhu bembulana izinqe. Ngesikhathi sikaMsholozi kwakuqala ngqa ukuthi sibone abaholi be-ANC belahla iqembu behambisana nemibono yamaqembu aphikisayo. Ukwethenjwa kwabo kwaholela ekutheni agcine uMsholozi esepheka ethulula ngenxa yokuthi abantu ayesebenza nabo babengathembekile.
Ziningi izinto ezinhle ezenzeke ngesikhathi sikaMsholozi kodwa azigqanyiswa kugqanyiswa okubi. Ubengumholi onohlonze ethandwa ngabalandeli futhi ihlo lakhe belibheke ezindaweni zasemakhaya nasemalokishini njengoba sibonile kwakhiwa imigwaqo, amabhuloho, inxanxathela yezitolo, izikole nokunye. Uzakhele isigcwagcwa kubelungu ngenxa yokuthi ukhulume udaba lokukhululwa kwabansundu ngakwezomnotho nokunikwa kwabantu umhlaba nemfundo simahla. Yize kunjalo kulokhu kuqhubekile ukugxekwa kwakhe nabanye abaholi abanindeka kumakhomishini. Uma sesikhuluma iqiniso ukhona yini ongama ngonyawo olulodwa athi umsulwa? Ngisho neBhayibheli liyasho ukuthi akekho ongenasono. Mahlafuna Mkhize ENEWLANDS WEST