KwaCaluza bahlukene ngemibono ngolokuvota
AHLUKENE phakathi ngokuvota amanye amalungu omphakathi waKwaCaluza, eMgungundlovu, njengoba kuzobe kunokhetho lukazwelonke ngoMeyi 8.
Yize amalungu enemibono ehlukene mayelana nokuthuthuka kwale ndawo kodwa adalule ukuthi asewuvivele uMeyi ukuze eyovotela uhulumeni ozoletha intuthuko.
UMnuz Thembinkosi Paneng uthe uyayibona imizamo kahulumeni kulo mphakathi.
“Mina ngikubhalisele ukuvota futhi ngizovota. Ngibone uhulumeni esakhela imigwaqo kule ndawo ngakho nginethemba lokuthi usazoqhubeka asakhele nezindlu. Ngiyathemba nemisebenzi sizoyithola,” kusho uPaneng.
UMnuz Sabelo Mbatha uthe yize intuthuko iza kancane kule ndawo kodwa uzovota.
“Angigculisekile ngendlela intuthuko eza ngayo kule ndawo. Izindawo esakhelene nazo zithuthuke kangcono kunale ndawo. Kule ndawo sisenenkinga kagesi nokuthuthukiswa kwentsha kodwa ngizovota ngethemba lokuthi kuzoba ngcono,” kusho uMbatha.
UNksz Eunice Dlamini naye ukhale ngokungathuthuki kwale ndawo.
“Ngikulungele ukuvota kodwa inkinga kule ndawo yikhansela elingenandaba nokuthuthukwa kwabantu. Uma ngiyovota ngiyathemba ukuthi kuzoba noshitsho,” kusho uNkk Dlamini.
Amanye amalungu omphakathi abe nokunqikaza ngokuvota njengoba ebekhala ngohulumeni ongazigcini izethembiso.
UMnuz Xolani Chonco uthe yena akasiboni isidingo sokuvota ngoba akakaze ayibone intuthuko elethwe uhulumeni kulendawo.
“Uhulumeni wentando yeningi wangena ngo-1994 kodwa ayikho intuthuko etheni engisayibonile kule ndawo. Ngike ngavota ngaphambilini kodwa alukho ushintsho olwenzekile. Ngakho ngeke ngikuqinisekise ukuthi ngizovota kulolu khetho,” kusho uMbatha.
UMbatha uthe imbangela yalokhu kungenzeka ukuthi uhulumeni obusayo akazigcini izethembiso azenza kubantu.
UMnuz Sipho Zuma naye ukhale ngohulumeni ongazigcini izithembiso.
“Uhulumeni awusenzeli lutho. Siyihlazo isimo esiphila ngaphansi kwaso kule ndawo kodwa kulindeleke ukuthi kube yithi esivotayo. Mina ngeke ngivote ngoba uhulumeni awukaze ungisize ngalutho,” kusho uZuma.