KUXWAYISWE ULEBESE NGOKUZIXAKA NGOMLINGO
INHLOKO yabaqeqeshi kwiSuperSport United, uKaitano Tembo, ixwayise uGeorge Lebese ngokuthi angalokothi azixake ngokugcwalisela iMamelodi Sundowns abolekiswe kubona iyona uma la maqembu asePitoli esetholene phezulu koweligi namuhla ngo-7.30 ebusuku.
Kuzobe kungumdlalo wokuqala ukuthi uLebese abhekane neqembu okuyilona asemabhukwini alo ngokugcwele kusukela elishiye ekuqaleni konyaka. Lo mdlali ozakhele udumo ekwiKaizer Chiefs ufike kwiSundowns izinto zangahamba ngendlela abefisa ngayo okuholele ekutheni awelele ngakwiSuperSport ngesikhathi kuvuleke iwindi lokushintshana ngabadlali ngoJanuwari.
NgokukaTembo, uma uLebese elitholile ijezi kufanele akhohlwe yikhona konke okwenzeke kuyena esekwiSundowns kepha adlale ibhola aziwa ngalo.
“Uma elitholile ithuba kumqoka ukuthi adlale ngendlela ajwayele ngayo, angazami imilingo ngoba lokho kuzomxaka. Uma ezicindeza uyena ozoba nenkinga bese nathi siba nenkinga. Kubalulekile ukuthi azi ukuthi lo mdlalo awuhluke ngalutho kunale eminye asesidlalele kahle kuyona,” kusho uTembo.
ULebese udlale kahle iSuperSport idedela amaphuzu ngempelasonto ibhekene nePolokwane City. Akubone kulo mdlalo uTembo uthe kungamjabulisa uma engaphinde akubone.
“Ingihlabe umxhwele indlela adlale ngayo sibhekene nePolokwane. Udlale kahle kakhulu futhi uma engaqhubeka ngingajabula kakhulu. Kumqoka ukuthi akhumbule njalo ukuthi lo mdlalo awuthinti yena yedwa kepha oweSuperSport. Asikho isidingo sokuzama ukuziveza kulo mdlalo ngoba akekho ongamazi ukuthi ukwazi ukwenzani uma esefomini. Inkinga iqala uma uzicindeza wena! Lokhu kuholela ekutheni kube namaphutha esigcina sithwala kanzima sonke ngenxa yawo.”