Ligawule kwacaca izembe kwaweMotsepe League
LIGADLE kwezwakala izembe kwiKZN ABC Motsepe League.
Nakuba emdlalweni wokugcina i-Ashley United kaVusi Mthembu, ishaye iHappy Wanderers ngo 2-1 kobuseSouth Coast Academy kodwa ngesizini ezayo izogijima kwiSAB Under 21 League.
Emuva kwemidlalo ewu-28 isonge inamaphuzu awu-27. Ikwaze ukunqoba imidlalo emihlanu kuphela, yadlala ngokulingana kweyishumi yase ihlulwa kwewu13.
Imbazo iphinde yagenca ngesikhulu isihluku iMaritzburg City kaBongi Hlophe ebese ihlale iminyaka ewu-16 kwi-ABC Motsepe League phambilini ebeyaziwa ngeVodacom Lague.
Leli qembu elasungulwa ngabo1960 lisonge isizini lisendaweni ka-15 kwi-log ngamaphuzu awu-27.
Ngeledlule liyeke ithuba lokuvika izembe livumela ukushaywa yiMilford FC ngo 2-0 emdlalweni obuseMhlathuze Sports Complex, eRichards Bay.
ICity eyaziwa ngokukhiqiza abadlali bezinga eliphezulu inqobe imidlalo eyisikhombisa, yadlala ngokulingana eyisithupha, yahlulwa kwewu-15.
IMilford esendaweni yesithathu uma kusukwa emsileni ngamaphuzu afanayo, ibambe umoya. Imincele ukuthi iReal Kings edlala kwiNational First Division (NFD) ingadliwa yizembe bese iSummerfield Dyanamos ikwazi ukunyukela esigabeni esiphezulu.
UHlophe uthe nakuba kubuhlungu kodwa kuzomele baqhubeke nomsebenzi webhola. Uveze ukuthi okubashaye kakhulu kule sizini kube wukushiywa ngabadlali abaningi.
“Ngaphandle nje kwezinye izinkinga kodwa ukuhamba kwabadlali abebewumgogodla weqembu kusishaye kakhulu. Abafana bami esisale nabo bawenzile umsebenzi. Kuzomele singavumeli ubuhlungu kodwa sisukume sizithathe,” kubeka uHlophe.
Kwenzeka lokhu nje, kwala kancane ngo-2012 ukuthi iCity eqeqeshwa u-Andile “Sguda” Cele owakhiqizwa yilo leli qembu, inyukele kwiNFD.
Mayelana nezinhlelo zeSAB Under 21 League, uHlophe uthe: “Sizoxuba abadlali ebesidlala ngabo kwi-ABC Motsepe League nabadlala ohlakeni lwethu lukaUnder 17. Nakuba sisazohlala phansi nethimba labaqeqeshi kodwa sizozibekela amasizini amabili ukubuyela kwi-ABC Motsepe League.”
Phakathi kwabadlali bezinga eliphezulu abakhiqizwe ngezikaHlophe kukhona uMbulelo “OJ” Mabizela, Jimmy Tau, Mlungisi Professor Gumbi, Papi Zothwane, Arthur Bartman, osanda kudlula emhlabeni, Thabiso Ramile, Nsizwa Myingwa, Andile Cele, Siphesihle “Trinity” Ngobese, Siphelele “Shaka” Mthembu odlala kwiCape Town City, Siphesihle Ndlovu weMaritzburg United, ukusho abambalwa.
Kwezinye izifundazwe amaqembu osekucacile ukuthi aya kweyokuhlungela ukuya kwiNFD, iMadritas FC yaseLimpopo, Acornbush United yaseMpumalanga, iDondol Stars yaseGauteng, iMangaung United FC yaseFree State noMthatha Bucks wase-Eastern Cape.
ENorth West kubonakala kungekho okusengavimba iBuya Msuthu enamaphuzu awu73. Isalelwe umdlalo owodwa. Ngesifanayo naseWestern Cape kwiSteenberg enawu-61, esalelwe emibili.
Imiphumela ye-KZN ABC Motsepe League:
Ashley 2-1 Waderers; Dyanamos 2-2 XI Experience; Milford 2-0 City.