UBabo noNtando ezingozini zomgwaqo
ABACULI bakuleli, uBabo Ngcobo noNtando Bangani basinde ezingozini zomgwaqo ngokwahlukana. Isolezwe lithole ukuthi uBabo ube sengozini yemoto ngoLwesine ntambama, okuqinisekiswe yilo mculi.
“Ingozi yenzeke uma ubheke ngaseTafuleni. Kukhona imoto ebengizophambana nayo eqhamuke isishibilika yaphenduka kabili phambi kwami. Ngivele ngama ngangazi ukuthi ngenzenjani yangishayisa yangikhipha emgwaqweni,” kusho uBabo.
Ubehamba ngeToyota Rav4 eba sengozini ne-Opel Corsa. Uthe akazwanga lutho ngemuva kwesigameko.
“Ngike ngahlala imizuzu cishe emihlanu ngisadidekile, kwaze kweza umshayeli engishayisene
naye engqongqoza engibuza ukuthi angilimele yini. Kufike nabezimo eziphuthumayo bangihlola bangathola lutho,” kuchaza uBabo.
Uthe ukholwa wukuthi umzimba ubusashisa ngoba ngempelasonto uzwe izinhlungu ekhanda, ehlombe nasedolweni.
“Sengizoqala ngiyinake kahle le ndaba yokulimala kwami ngoba ngiqiniselile ngiyocula ePort Shepstone,” kusho uBabo.
Ubenandisa emcimbini Uvukile Gospel Festival, oGu Sports and Leisure Centre, ePort Shepstone ngeSonto ebusuku eqinisela ngemuva kwengozini.
UNtando yena ube sengozini ngoLwesihlanu ntambama. Utshele Isolezwe izolo ukuthi ubesendleleni ebheke e-studio ngesikhathi ehlelwa yingozi.
“Bese ngizofika ngase-studio ngiyowela irobhothi. Angazi kuseCresta noma eLinden laphaya. Bekungekho izimoto eziningi emgwaqweni.
Kuvele kwaqhamuka imoto emnyama ebigijima sashayisana. (Umshayeli) ungitshele ukuthi uphelelwe amabhuleki kodwa ngenhlanhla asilimalanga sobabili. Ngitubekile nje,” kusho uNtando. Uthe ukwakhe lapho elulama ekhona. Khonamanjalo, kubikwe ukuthi nomgadli weKaizer Chiefs, uKhama Billiat ube sengozini yemoto. Ngokombiko we-website yaseZimbabwe, lapho edabuka khona, i-www.soccer24.co.za, imoto iphume emzileni yashayisa eceleni ngeSonto ebusuku. Kuthiwa uphume engenamyocu.