Uzovela enkantolo obulale iphoyisa ngokulidubula
KULINDELEKE ukuthi avele enkantolo yaseThekwini maduze osolwa ngokubulala ngesibhamu iphoyisa ebelizosesha imoto yakhe eSydenham, eThekwini ngeSonto.
UConstable Nkanyiso “Nkah” Biyela (28), obesebenza esiteshini saseSydenham, ophikweni iCrime Prevention, udutshulwe emgwaqweni uM19 esondela emotweni ebisolisa.
Ngokusho kokhulumela amaphoyisa kuleli uBrigadier Vishnu Naidoo, leli phoyisa ebelisemsebenzini lishone lisendaweni yesigameko.
“Umufi nabanye ozakwabo bebeqaphe isimo emgwaqweni uM19, ophakathi kweReservoir Hill nePinetown. Umufi ubone imoto ipakile emgwaqweni ikhanyisa ama-hazard. Ube eseya kuyona ukuze ayoyiphenya. Obesemotweni uvele wadubula wabulala iphoyisa. Ube esebaleka endaweni yesigameko. Kodwa ekuhambeni kwesikhathi wazinikela emaphoyiseni aseSyndenham. Usagcinwe ezitokisini ukuze abhekane necala lokubulala,” kusho uNaidoo.
Uthe kusazophenywa imbangela yesigameko. Sekujutshwe ochwepheshe bamacala afuze lawa abangaphansi koKlebe.
Umkhuzi wamaphoyisa kuleli uGeneral Khehla Sitole udlulise amazwi enduduzo ngokubulawa kwephoyisa.
“Sengicele umkhuzi wamaphoyisa eKZN uLieutenant General Mkhwanazi ukuba enze isiqiniseko sokuthi kuyaphenyisiswa ngalesi sigameko,” kusho uSitole. Isolezwe lihoshe umoya wokuthi umsolwa kuleli cala wumsebenzi wenkampani yonogada naye obeyohlola isimo endaweni.
Kunezinsolo ezingakaqiniswa amaphoyisa ukuthi uzitshele ukuthi uzobanjwa inkunzi kwazise iphoyisa belingawugqokile umfaniswano wawo.
UNaidoo ukuqinisekisile ukuthi iphoyisa belingawufakile umfaniswano walo, uphiko abelusebenzela luyakuvumela lokho.
Imizamo yokukhuluma nomndeni wephoyisa ayizange iphumelele. Ngokusho kwabakhulumela amaphoyisa, abomndeni abafisi ukukhuluma nabezindaba ngalolu daba. KwiFacebook waleli phoyisa kuvele ukuthi belinengoduso eliyithembise umshado ngoMeyi 2018.