Uzidubule wafa obulale umfowabo ngephutha
UZINGQOKLOZE ngesibhamu wazibulala owesilisa okuthiwa udubule wabulala umfowabo ngephutha edakiwe, ngeSonto.
UMnuz Zama Zondi kuthiwa udubule umfowabo, akade ephuza naye uMnuz Sinenkosi Zondi (26), ngephutha.
Kuthiwa uZama uthathe umfowabo obesedubulekile ngemoto ethi umphuthumisa esibhedlela ukuze athole usizo kodwa washona besendleleni.
Ngokuthola kweSolezwe, uZama unele wabona ukuthi umfowabo useshonile, wangabe esaqhubeka nokuya esibhedlela. Uhambe nesidumbu ngayo imoto abebeya ngayo esibhedlela waya eweni elikuyo le ndawo wafike wasilahla khona.
Ngemuva kwalokho kuthiwa ube eseya emndenini eyochaza ukuthi kwenzekeni, waphinde wacela uxolo ngesenzo sakhe. Umndeni obusadidekile uzwe sekuqhuma isibhamu naye esezidubula, washonela lapho.
Kuthiwa laba ababili bebengehlukani,
bebehlale behamba ndawonye beyozijabulisa ngokuphuza. NgeSonto bebehamba bobalili njengenjwayelo. Akucaci ukuthi uZama ubenzani ngesibhamu ngesikhathi siqhuma kudubuleka u mfowabo. Okhulumela amaphoyisa KwaZuluNatal, uCol Thembeka Mbele, usiqinisekisile lesi sigameko wathi ngokuthola kwabo isihlobo okusolwa ukuthi besidle amanzi amponjwana sidubule esinye ngephutha, isidumbu saso sasilahla eweni.
“Kubizwe abezimo eziphuthumayo nophiko lwezinja ukuthi luyolekelela njengoba bekubhekwa isidumbu sesihlobo esibulewe lapho bekusho khona umsolwa, ngaphambi kokuthi naye azibulale.
“Ngemuva kokubheka eweni elinehlathi isidumbu sitholakale ekujuleli kwewa endaweni engamamitha angu-40,” kusho yena.
Uqhube wathi kuvulwe icala lokubulala nedokodo lophenyo eliphenywa esiteshini samaPhoyisa eMatimatolo.
Imizamo yokuxhumana nomndeni izolo ayiphumelelanga.