Uhulumeni uzolekelela eyabashonile
UHULUMENI waKwaZuluNatal namuhla kulindeleke uphelezele imindeni yabangu-13 abashone kudilika udonga esontweni eDlangubo eMpangeni, ukuyokhomba izidumbu emakhazeni.
Lokhu kuvele izolo esithangamini nabezindaba lapho uNdunankulu wesifundazwe, uMnuz Willies Mchunu nabanye ongqongqoshe. bebecacisa khona ngezinhlelo zokulekelela imindeni.
Kwabashone kulesi sehlakalo esenzeke ePentecostal Holiness Church ngoLwesine, kukhona nomfana u-Andiswa Mthabela (13), obefunda eNyathi Primary.
UNdunankulu uthe babize umhlangano ophuthumayo nomkhandlu wongqongqoshe ukulungiselela izinhlelo zabashone esontweni. Uthe bayaqhubeka nokuxhumana nabaholi bebandla futhi uhulumeni wesifundazwe uzolekelela emngcwabeni.
Uthe kulaba abangu-16 abalimala, baphuthunyiswa esibhedlela eNgwelezane, abanye abakaphumi.
“Sekujutshwe ithimba elizophenya ngalesi sehlakalo okubalwa nonjiniyela abazobheka
ukuthi isakhiwo besisesimeni yini. Siphinde sathola ukuthi kusona lesi sifunda kuphinde kwashona abahlanu engozini yeveni, okuthiwa bebeya emembesweni eNgudwini ngempelasonto. Sibone kungcono ukuthi nabo sibafake esinhlelweni, kuhlanganiswe inkonzo yokubakhumbula nalaba abashone esontweni,” echaza.
Uthe uyafisa ukuthi izinkonzo zemingcwabo zihlanganiswe ngoba abaningi abangandawonye, bese bengcwatshwa ngokuhlukana. Mayelana nokuphelezela izihlobo emakhazeni, uthe bazobe benazo zonke izinhlaka ezizosiza, okungenzeka amanye amalungu omndeni adinge ukwelulekwa ngokomqondo. Uthe kuzophinde kube nomkhuleko khona namuhla ozolandelwa yinkonzo yokukhumbula abashonile ngoLwesine, kulona isonto okwenzeke kuso lesi sigameko.
UNgqongqoshe wezokuBusa nokuBambisana noBuholi boMdabu eKZN, uNkk Nomusa Dube-Ncube, uthe namuhla kuzoyiwa esikoleni somfana oshone esontweni, kululekwe nabafundi.
Uthe njengoba isakhiwo sesonto lidilizwe izimvula ezinamandla nomoya, isimo sezulu sisazoqhubeka nokungabi sihle. Uthe kusukela namuhla lizophenya kodwa ngesonto elizayo kulindeleke ezinye izimvula.
“Siyaqhubeka nokuxwayisa umphakathi uma kuzoba nezimvula ezinamandla nokuduma kwezulu. Sizokwenza nezinhlelo zokuthi amathimba ethu ezinhlekelele abe seduze kwalezo zindawo ezizohlonzwa njengezizothinteka kakhulu,” kusho yena.
Lesi sehlakalo sokudilika kwesakhiwo sesonto senzeka ngezithuba zabo-10 ebusuku. NgoLwesihlanu, kuvakashe endaweni yesigameko ongqongqoshe abahlukene, kwathi uMengameli uMnuz Cyril Ramaphosa wathumela umyalezo wenduduzo. Ngokwesitatimende esithunyelwe yibandla kuthiwa uRamaphosa wake wavakasha kuleli sonto phambilini. Ngesikhathi sokuloba bezingakaphothulwa izinhlelo zomngcwabo.
Nawa amanye amagama abashone esontweni:
-Samukelisiwe Mzila (Ulundi)
-Nokuthula Hlongwane (Howick)
-Bongekile Masondo (Ulundi)
-Thandazo Dube (Ulundi)
-Minenhle Mdluli (Ulundi)
-Nonkanyiso Shandu (Ulundi)
-Thembi Mthabela (UMlalazi)
-Alta Langa (UMlalazi)
-Lungi Mcambi (UMhlathuze)
-Ntando Mlondo (UMhlathuze)
Thule Ncube (UMhlathuze)
-Alice Mhlongo (uMhlathuze)