Akumjabulisi ukwehla kwezingozi
UNGQONGQOSHE wezokuThutha kuleli, uDkt Blade Nzimande, uthi yize izingozi zomgwaqo zehle ngo41%, kulesi sikhathi samaholidi ePhasika uma kuqhathaniswa nonyaka odlule kodwa usakhathazekile ukuthi abantu basaqhubeka nokubhubha emgwaqweni.
UNzimande izolo obesemgwaqweni uN3, eMariannhill Toll Plaza, lapho amaphoyisa kade enze khona isivimbamgwaqo njengoba iningi labantu kade libuyela emakhaya nasemsebenzini emuva kwamaholidi ePhasika.
Ekhuluma nabezindaba
uNzimande, uthe akakwazi ukuzishaya isifuba uma abantu besaqhubeka nokushona ezingozini zomgwaqo.
Uthe izingozi eziningi zomgwaqo zidalwa abantu abashayela bephuzile nalabo abasebenzisa amaselula. “Kumele ziqiniswe izinyathelo ezithathelwa abantu abashayela bephuzile ngoba ibona abadala kakhulu izingozi. Umuntu ongena emotweni edakiwe naye uzibeka engozini yokuthi alimale noma alimaze abanye abashayeli,” kusho uNzimande.
Uthe kusukela befikile ngabo 9, ekuseni eMariannhill ezimotweni ezingu 700, u-10% wazo ubungekho esimeni sokuba semgwaqweni.
“Akujabulisi uma uthola ukuthi eyodwa imoto kwezingu-10, ezihloliwe ayikho esimeni esifanele. Ngabe kungcono ukuba kuthiwa iyodwa imoto kwezingu-100, ayikho esimeni,” kusho uNzimande.
Uthe kunezimoto abazithathile ngenxa yokuthi bezingekho esimeni sokuba semgwaqweni.
“Kunetekisi okubonakala ukuthi ibikhandwa, isalenga nezintambo esiyivimbile abagibeli bayo sabafaka kwenye imoto, nabagibeli bathukile uma bethola ukuthi imoto abahamba ngayo ayikho esimeni,” kusho uNzimande.
Uthe into ebasize kakhulu ekutheni kwehle izingozi kulo nyaka ukugcwala kwamaphoyisa emgwaqweni.
“Ngicabanga ukuthi amaphoyisa kumele ahlale emaningi emgwaqweni, hhayi ngoba kungamaholidi kuphela ngoba lokho kwenza ukuthi abashayeli baziphathe kahle,” kusho uNzimande. Uthe uyafisa ukuthi usheshe uphasiswe umthetho wokuphuca abashayeli abaphula umthetho amaphuzu.
“Silindele ukuthi lo mthetho uphasiswe ngoba uzosisiza kakhulu ekulweni nezingozi zomgwaqo ngoba umshayeli sizomnika amaphuzu angu-12, silokhu siwehlisa aze aphele uma ephula umthetho, bese siyamphuca izincwadi,” kusho uNzimande.
Uveze nokuthi namanye amaphoyisa omgwaqo anesandla ekwenyukeni kwezingozi ngenxa yokugwazisa izaphulamthetho.
Ingozi enkulu eyenzeke KwaZulu-Natal ngaphambi kokuthi kuqale amaholidi ePhasika ileyo eyehle kuN11, eNewcastle lapho kubhubhe khona abantu abahlanu ngemuva kokushayisana kwetekisi neloli.